كلنا تابعنا جنون الذهب في الاسابيع الماضية، حيث سجل المعدن الأصفر أسعار قياسية داخل وخارج مصر. ولكن الآن هو في حالة من التذبذب.
فياترى سعر المعدن الأصفر رايح على فين؟ وهل ممكن يكمل انخفاض والجرام فعلا يبقى ب1000 جنيه بس؟حاليا سعر عيار الدهب 21 والأكثر مبيعا في مصر معدي ال2000 جنيه للجرام، والناس محتارة تشتري ولا تبيع.
وعشان نجاوب على السؤال ده، لازم الأول نبص على السوق، وهتلاحظ انه بيسجل خلال الساعات الأخيرة انخفاض في اسعار الدهب عالميا، طيب ليه؟
الفكرة كلها ياسيدي ان المستثمرين مع بداية انهيار سيليكون فالى وكريدي سويس، خافوا جدا على فلوسهم، عشان كده اشتروا دهب بكميات كبيرة باعتباره ملاذ أمن للحفاظ على قيمة الفلوس، وده اللي رفعه سعره جامد.
لكن دلوقتي الأزمة ابتدت تهدي شوية والحكومة ادخلت، عشان كده الطلب على الدهب بدأ يقل شوية واسعاره تتراجع.
وهنا بقى بييجي السؤال المهم ايه حقيقة التوقعات باستمرار الانخفاض ده عشان سعر الجرام في مصر يرجع ل1000 جنيه؟
الخبير الاقتصادي استبعد ده تماما، بل بالعكس: قريب اوي هنشوف الدهب بيسجل أعلى سعر في تاريخه، وده بسبب الظروف الاقتصادية الصعبة اللي بيعيشها العالم، وكمان توقعات تخفيف الفيدرالي الأمريكي بمعدلات رفع الفايدة.
وعلى فكرة، قبل الاجتماع الاخير للفيدرالي الكل كان متوقع انه هيرفع الفايدة بنسبة 0.5% ، بس لما حصل إفلاس بنك سيليكون فالي، المشهد اتغير، واضطر الفيدرالي يرفع الفايدة 0.25 % بس، عشان يقلل التكلفة على البنوك اللي بتضطر ترفع الفايدة على ودائع العملا.
وخدها قاعدة: انخفاض الفايدة على الدولار معناه ارتفاع في أسعار الدهب عالميا.ضيف على كده كمان توقعات أمير رزق، خبير المشغولات الذهبية، بزيادة جرام الدهب الواحد 1000 جنيه في شهر سبتمبر الجاي، وده في حالة إقبال المستثمرين على شرائه لتحقيق أفضل الأرباح.
وفي نفس الوقت، شعبة الدهب شايفة ان ده وقت مناسب للشراء واللي معاه ميبعش ويستنى شوية.
ولو انت فاكر، جنون أسعار الدهب في 2022، كان سببها شراء البنوك المركزية على مستوى العالم لكميات كبيرة من الدهب كملاذ أمن، فتخيل بقى لو ده حصل تاني، أسعار الدهب هتبقى كام.
فلو قررت تأمن نفسك من دلوقتي وتشتري دهب،
لازم تبقى عارف انه ادخار طويل الأجل، وتبقى متأكد انك مش هتحتاج فلوسه دلوقتي عشان تضمن تبيع بأكبر مكسب بعدين.
ولو السيولة معاك كبيرة شوية الأفضل انك توزعها على أوزان صغيرة، عشان لاقدر الله لو حصلت ظروف واحتجت سيولة تقدر تبيع على قد المبلغ اللي محتاجه بس
وطبعا الأفضل تشتري السبيكة أو الجنيه الدهب، لان سعر المصنعية عليهم أقل من المشغولات الذهبية العادية.ودلوقتي بقى قوللنا انتوا من الناس اللي اشترت دهب فعلا ولا لسة بتفكروا؟
