الكل لا يتحدث خلال الساعات الماضية الا عن زيادة أسعار السولار الاخيرة، وهذا بسبب قلقهم من تأثير هذه الزيادة على أسعار السلع في الأسواق المصرية. وطبعا أهم سلعة بالنسبة للمصريين هي الخبز، فـ ياترى هل تشهد أسعار الخبز يادة الأيام القادمة؟ تابعونا لمعرفة التفاصيل:
أسعار العيش والدقيق بعد ارتفاع السولار
متقلقش خالص وده لأنه حسب تصريحات خالد صبري، سكرتير شعبة المخابز بالغرفة التجارية، لـ موقع القاهرة 24: قرار لجنة التسعير التلقائي للمنتجات البترولية برفع أسعار لتر السولار بـ 1 جنيه مش هيأثر على أسعار الخبز سواء المدعم أو حتى السياحي في مصر.
وقال سكرتير شعبة المخابز بالغرفة التجارية في القاهرة إنه بعد قرار لجنة التسعير التلقائي للمنتجات البترولية برفع أسعار السولار جنيه واحد:
الحكومة علطول مكدبتش خب، وأعلنت إنها هتتحمل فرق تكلفة سعر السولار على مخابز العيش.
وقالت إنها هتدي صاحب المخبر فرق السعر علطول وبشكل دوري كمان، وده عشان يفضل سعر بيع العيش على البطاقات التموينية بنفس سعره اللي الناس بتشتري بيه.
بس طبعا مش كل المصريين بيشتروا العيش على البطاقة، وفي ناس بتدفع مبلغ وقدره شهريا عشان يجيبوا العيش من المخابز السياحيه.
الناس دي بقى مصيرها ايه؟
سكرتير شعبة المخابز بالغرفة التجارية قال إن أسعار الخبز في المخابز السياحية اللي شغاله في مصر مش هيحصل فيها أى زيادات بعد ارتفاع سعر السولار.
وده لأن حجم المخابز السياحية اللي بتشتغل بالسولار قليل جدا لو قارناه بالمخابز اللي بتشتغل بالغاز الطبيعي .
ومش بس كده ده كمان اتكلم وقال إن سعر طن الدقيق استقر في السوق المحلي عن مستوى 14 ألف جنيه بعد ارتفاع المعروض المحلي من القمح، وده في صالح أسعار العيش.
وهو ده نفس الكلام اللي قاله الدكتور على المصيلحى، وزير التموين والتجارة الداخلية، وأكد فيه إن الدولة ممثلة في الهيئة العامة للسلع التموينية التابعة للوزارة هتتحمل فارق تكلفة تصنيع رغيف الخبز اللي بتنتجه المخابز البلدية واللي بتشتغل بوقود السولار.
كمان المصيلحي أكد أن المواطن هيحصل على العيش البلدي المدعم بـ بطاقة التموين بسعر 5 قروش بس، وإن الدولة هتفضل تتحمل فرق تكلفة الإنتاج وتسددها لأصحاب المخابز من خلال هيئة السلع التموينية.
والمفترض إن الحكومة طبقت قرار رفع أسعار السولار بالتسعيرة الجديدة من يوم الخميس 4 مايو، وده بعد ما أصدرت لجنة التسعير التلقائي للمنتجات البترولية قرار برفع سعر السولار جنيه واحد للتر عشان يوصل سعر البيع فى السوق المحلى لـ 8.25 جنيه للتر.
لكن في المقابل قررت تثبيت اسعار البنزين بأنواعه عند 8.75 جنيه للتر البنزين 80 و 10.25 جنيه للتر البنزين 92 و 11.50 جنيه للتر البنزين 95 .
دلوقتي قولولنا رأيكم في قرارات الحكومة الأخيرة وخاصة إنها كانت حريصة إن أسعار العيش السياحي والمدعم تفضل زي ما هي ؟
