طول عمرنا نعرف اللحمة البرازيلي، ومؤخرا بدأنا نرى الفراخ البرازيلي، لكن توصل للوبيا البرازيليفهو أمر جديد علينا!
فياتري ما حكايتها؟ وهل اللوبيا عندنا في مصر قصرت مع التجار؟ طيب ليه يجيبوا البرازيلي؟ وسعرها كام؟ وإيه حكاية ال40 شركة الروسية؟
مع غلاء الأسعار الحكومة بتحاول تدور على بديل، يعني بدل ماتشتري اللحمة البلدي ب250 جنيه واكتر للكيلو الواحد، تقدر تشتري اللحمة البرازيلي من منافذ الحكومة: الكيلو ب165 جنيه ووفر الباقي.
شوية شوية، وحصلت أزمة نقص الاعلاف والفراخ بقت للقادرين بس، وده بعد ما الكيلو بقى ب100 جنيه، فهل الحكومة تسكت؟
لأ، رحنا استوردنا فراخ من البرازيل والكيلو فيها ب65 جنيه، عشان نظبط السوق، وفعلا الفراخ البيضا في مصر أسعارها بدأت تنزل ودلوقتي الكيلو بحوالي 80 جنيه.
ودلوقتي بقى الدور على الخضار، المحلات بدأت تنزل لوبيا برازيلي في السوق، طيب ليه؟
السر في السعر ياسيدي، مصطفي الشيخ عضو شعبة العطارة في الغرفة التجارية بالقاهرة قال في تصريحات صحفية إن سعر كيلو اللوبيا البرازيلي ب 36 جنيه، لكن النوع البلدي سعره 40 جنيه.
وفي تقديرات تانية بإن سعر بيع كيلو اللوبيا البرازيلي للمستهلك بيتراوح من 40 إلي 45 جنيه بينما اللوبيا البلدي تتراوح من 45 إلي 52 جنيه.
يعني في النهاية اللوبيا البرازيلي أرخص من المصري، ولو فاكر ان الحكاية انتهت كده تبقى غلطان، المنتجات البرازيلي لسة مكملة معانا بس المرة دي بالبهارات.
وزى ما المحلات نزلو لوبيا، نزلوا كمان فلفل اسود، بس العكس المرة دي هو اللي حصل، الفلفل الأسود البرازيلي أعلى من النوع الفيتنامي الموجود في السوق بحوالي 20 جنيه.
طيب هي الحكاية في منتجات البرازيل بس؟
الإجابة لأ، اكيد سمعتوا عن الزيت الروسي التيرو حتى لو مشفتهوش، لكنه نزل المحلات وقلب الدنيا في ساعتها.
ومش بس كده، في 40 شركة ناوية تطرح منتجاتها في مصر، والقايمة فيها زيت عباد الشمس ودرة، ودقيق ومكرونة ولبن المجفف، وفراخ المجمدة.
وكمان مختلف أنواع الحبوب زي العدس الأحمر والبني والأخضر، والذرة والحمص والأصفر، والكتان والشوكولاته.
.
وفوق ده كله، الحكومة منحت 34 شركة روسية الحق في توريد منتجاتهم من الأسماك لينا، عشان يزيد عدد الشركات المسموح ليها ببيع الأسماك في مصر إلى 85 شركة من 2019 لغاية دلوقتي.
وفي تقارير بتتكلم عن مفاوضات بين مصر وروسيا لاستيراد الالبان ومنتجاتها، بس لسة مفيش تصريح رسمي عن الموضوع ده.
والمصادر بتقول ان في مفاوضات لاستيراد منتجات الألبان والايس كريم، وكشفت عن اهتمام شركتين روسيتين بالسوق بتاعنا في الفترة الأخيرة، خصوصا مع ارتفاع احتياجات مصر من الألبان، وتحديدًا للتصنيع الغذائي.
انتوا بقي ايه رايكم في استيراد اصناف جديدة من برة وهل ده هيوقف تحكم التجار في السوق و يقلل الأسعار للمستهلك اللي زيي وزيك؟
