الموضة هذه الفترة في الوسط الفني، هي الشكوى من التجاهل.،كل فنان يطلع يقول لا يسأل عني أحد وتذكروني بأي دور، إلا الفنان أحمد عيد، اختفى في صمت ولكن عاد بضجة كبيرة فما الحكاية؟ سنعرف من خلال التقرير التالي:
الفنان أحمد عيد ظهر لأول مرة من سنين طويلة جدا في حفل joy awards من كام يوم، وكان وجوده على السجادة اللافندر مثير للاهتمام جدا، اختفى في ايه، وظهر ليه، محدش عارف، هو نفسه كل شوية يقول كلام وعكسه في نفس اللحظة.
أحمد عيد قال في تصريحات ليه في joy awards.. إنه مبسوط إنهم افتكروه وعزموه يحضر الحفلة.. رغم إنه مختفي من فترة عن الساحة الفنية والإعلامية.. في الوقت اللي فيه برامج كل شغلتها تدور على الفنانين اللي مختفيين.. أو اللي نجحوا في كام عمل ومحدش سمع عنهم تاني.. هو كان مستخبي بعيد عن الأضواء.
لغاية ما قررت الفنانة نيللي كريم ترجعه تاني للشاشة.. بعد آخر فيلم ليه اللي هو كان خلاويص ده قدمه مع أيتن عامر سنة 2018.. بس محدش سمع عنه.. والناس كلها فكراه قاعد في البيت من أيام “ياباني أصلي”.. السنين بتجري والله.
أحمد عيد كان بيشتغل في حاجات بس محدش بيسمع عنها.. منها المسرح اللي طلع منه واتعرف من خلاله.. وساعات بيألف مسرحيات وبيكتشف فنانين شباب.. بس دايما دراما رمضان بتفرق جدا مع الفنانين
الناس كلها فاكرة لما أحمد عيد اشتغل مع الفنان عادل إمام في صاحب السعادة سنة 2014.. إنه هيبقى نجم كوميديا رمضان كل سنة.. بس للأسف الدور على قد ما كان مساحته كويسة.. بس بيفضل الزعيم هو أبرز حاجة في أعماله.. ومش شرط بعدها النجوم اللي معاه يظهروا تاني.
ورغم كل ده.. كان أحمد عيد حريص إنه يوضح إنه مش بيشتكي.. الراجل ما صدق جاله دور “عملة نادرة”.. وأكد على إنه كان بيتكلم بهزار وميقصدش يشتكي.. وإنه كان بيتعرض عليه شغل كتير وهو اللي مش عاوز.. كان مستني حاجة تليق بيه.. الراجل كان نجم شباك .. أكيد مش هيطلع كومبارس بعد العمر ده يعني
وبالنسبة لموضوع “عينيه اللي مليانه حزن”.. كان حريص أحمد عيد إنه يرد على الموضوع ده.. ويأكد إنه ولا عينيه مليانة حزن ولا حاجة.. هو بس العمر بيجري وشكله بيتغير.. وسايب دقنه وشنبه عشان الدور اللي بيصوره دلوقتي
يمكن أحمد عيد ظلم نفسه لما حاول يبقى نجم أفيش لوحده.. كل نجاحاته زمان خصوصا في السينما كانت وهو سنيد مع نجوم أكثر وسامة منه شوية.. زي مصطفى قمر في قلب جريء.. وهاني سلامة في ازاي تخلي البنات تحبك
وهو ده الدرس اللي اتعلمه.. وبدل ما يستنى مسلسل من بطولته.. كانت خطوة ذكية منه يرجع للشاشة من خلال مسلسل مع نيللي كريم.. اللي بقت جوكر رمضان خلاص.. وكل الناس مستنية تشوفهم هما الاتنين في الصعيدي.. هنشوف هيعملوا ايه سوا.
