منذ فترة نسمع أخبار غريبة عن البيض، والتي تكون عن ارتفاعات كبيرة في أسعاره أو إشاعات تقول إنه مخصب وغير صالح للأكل، وهنا المواطنين بدأو يحسوا ببقلق وحيرة وبدأوا يتساءلوا عن الفرق بين البيض المخصب والعادي، وهل المخصب مفيد أم مضر للصحة؟ كل هذه الأسئلة سنعرف إجابتها من خلال التقرير التالي:
لازم في البداية تعرف إن الفرق بين بيض المخصب والعادي، إن المخصب هو بيض من ناتج الدجاج الذي يطلق عليه “الأمهات”، ومن المحتمل أن يكون من تلقيح الديوك، وبالتالي إخصابه
وعشان كده بيطلق مصطلح البيض المخصب على كل بيض التفريخ بناء على شكله الظاهري ومواصفاته من حيث الطول والعرض وغيره، وده على اعتبار إنه يا إما بيض مخصب أو قابل للتخصيب.
ولكن اللي انت متعرفوش إنه ممكن ما يكونش بيض التفريخ تم تخصيبه فعليا بمعنى أن في بيض تفريخ لا يصلح لإنتاج كتكوت “صيصان” وبيتم استخدامه للأكل.
والمفترض بيدخل البيض المخصب للماكينات الخاصة بالتفريخ ويتم فحصها في وقت معين، للتأكد من تلقيحها بالحيوان المنوي الخاص بالذكر وحدث إخصاب أم لا.
أما مصطلح البيض العادي فبيطلق على بيض المائدة، وينتج من دجاج بيض المائدة واللي يختلف عن البيض المخصب الخارج من الأمهات.
هل البيض المخصب يفرق صحيًا عن العادي؟
برغم إن سعره منخفض عن سعر البيض العادي، بس الأكيد إنه مفيش فرق ما بين البيض المخصب والبيض العادي من الناحية الصحية، ولكن الاختلاف الوحيد هو دخول حيوان منوي من الديك داخل البيضة التي يطلق عليها مخصبة وهو أمر لا يشكل فارقا.
طب لو سبنا البيضة المخصبة هتتحول كتكوت؟ تصدق ينفع، أيوه ده حقيقي لأن مع ارتفاع الحرارة أحيانا يحدث نمو للجنين داخل البيضة،لكن ده بيحصل في فصول الصيف الحارة، لكن في وقت الشتاء الحالي والبرد ده مش بيحصل وبالتالي لا توجد أي مشكلة فيه.
طب إزاي أفرق بين البيضة العادية والمخصبة؟ لو فاكر إنك ممكن تفرق لما تشوف البيضة فدا صعب جدا لأن شكل البيض ملوش علاقة بكون البيض مخصبا ولا لا، ولكن ده بيرتبط بنوع وسلالة الطائر.
فمثلا بالنسبة لبيض المائدة بيتم اختيار السلالة لإنتاج نوع البيض الأحمر أو الأبيض، أما سلالات التفريخ فييكون لون البيض فيها بدرجات مختلفة من اللون “الكريمي”، وهم مش بيهتموا بلون البيضة أصلا.
طيب إمتى أقول إن البيض ده غير صالح للأكل؟ لازم تعرف إن البيض اللي لا يصلح للأكل هو البيض المشروخ أو البيض الذي حدث داخله نمو جنيني، لكن الجنين نفق داخل البيضة.
وخلي بالك البيض بيكون عليه عدد من الثقوب، إضافة إلى مادة شمعية تسمح بتبادل الغازات، وبالتالي مينفعش نغسل البيض ونخزنه، لأن ده هيساعد في إزالة الطبقة الحامية وبالتالي دخول البكتيري، ويفضل لو هتغسلة يكون قبل الأكل مباشرة.
قولنا دلوقتي بتشتري البيض عندك بكام ؟
