من عائلة فنية معروفة من زمان، جدها المؤلف الكبير عبد الحي أديب ووالدهاالمخرج عادل أديب، وأمها الفنانة منال سلامة، بنت أخو الاعلاميين الكبيرين عماد أديب وعمرو أديب زوج الاعلامية لميس الحديدي.
بنتكلم عن الفنانة الصاعدة أميرة أديب اللي ظهرت في مسلسل «نقل عام»، مع محمود حميدة و سوسن بدر، والمسلسل ده يعتبر أول ظهور لـ أميرة في عمل فني.
احتجازها وقت الجائحة سبب شهرتها
بداية أميرة أديب كانت من خلال السوشيال ميديا اللي رصدت تجاربها الحياتية، وكانت البداية خلال الجايحة لما كانت في الولايات المتحدة الأمريكية، وقتها كانت محجوزة والحكومة المصرية اتدخلت لمساعدة المصريين بالخارج لعودتهم لأرض الوطن.
وقتها أميرة أديب رصدت الفرق بين الإجراءات الاحترازية في أمريكا ومصر وطلبت من الناس تلتزم بشروط السلامة.
كان من أبرز مواقف أميرة أديب ردها على رسالة واحد من المتابعين بخصوص اهتمامها بجسمها فردت عليه وقالت انها بتتقبل ذاتها زي ماهي والمفروض ان كل شخص يقبل ذاته بسعادة.
الناس عرفتها بسبب ازازة مية في الساحل
بعدها بدأت الناس تعرف أميرة أكتر لحد ما طلعت على خاصية الاستوري بصفحتها الشخصية وعملت فيديو قالت فيه “حرام يبقى سعر ازازة المية في الساحل الشمالي بـ 250 جنيه وفي أي مكان تاني بـ 5 جنيه بس!.
بتقول انها كانت بتصيف هي وصاحبتها آية عبدالحميد في الساحل ولما صاحبتها راحت تشتري مية في أحد الأماكن وهي بتطلع الفلوس الراجل قال لها 250 جنيه.. 250 ألف عفريت يركبوك”.
وجع غامض اكتشفته في أمريكا
أميرة أديب قبل متيجي مصر كانت بتدرس في أمريكا وأثناء دراستها اكتشفت معاناتها مع مرض فرط الحركة “ADHD”.
في بداية اكتشافها للوجع أميرة عرضت ده على أبوها وأمها حكاية وجعها فطلبوا منها ما توهمش نفسها وتهتم بمذاكرتهاوعدم التفكير في ده خالص لأن الدكاترة الأمريكان بيضخموا كل حاجة.
لكن بعدها بدأت الأعراض تزيد عندها فعرفت أميرة إن المرض ده بالذات بيختلف فيه الشحص عن التاني.. يعني بتشوف المسلسل وتلاقي الشخصية والأعراض اللي بتعاني منها مختلفة عن الواقع وأحيانا بتشوف شخص تاني تلاقيه شبهها.
أميرة لما اتكلمت عن وجعها قالت إن المشكلة الحقيقية إنه في مصر محدش بيتكلم بشكل جاد عن الصحة النفسية، ودللت على ده بحكايتها لما قالت لأبوها وأمها أنها بتعاني من مرض فرط الحركة فقالوا لها “مفيش حاجة كده.. الأمريكان بيأفوروا أنتي كويسة ادعي وصلي”.
أميرة عندها سلام نفسي بقتول هي مبسوطة ومطمئة رغم كل اللي بتعانيه سواء نسيان أو عدم تركيز أو كسل بسبب المرض وأكيد في طرق كتيرة للعلاج علشان تتحسن.
أبويا رفض دخولي مجال الفن
أميرة دخلت مجال الفن من أوسع أبوابه.. ولما دي مش هتمثل، مين يعني اللي هيمثل؟.. أبوها عادل أديب وده مخرج كبير أوي زي ما قلنا، وأمها الفنانة منال سلامة وخالها بقى الفنان شريف سلامة، ده غير أعمامها الاتنين.. إعلاميين كبار أوي أوي عماد أديب وأخوه عمرو أديب اللي هو جوز الإعلامية الكبيرة برضه لميس الحديدي.
يعني أميرة دي عايشة وسط الفنانين.. بالليل فن وبالنهار فن فالطبيعي تقابل المخرج الفلاني وتتعزم في بيت الفنانة الفلانية.. يعني هتلاقي الف واحد يساعدها.
لكن لما سألوا أميرة عن دخولها الفن بالواسطة قالت إن أبوها عادل أديب كان رافض تشارك في مسلسل «نقل عام»، اللي كان أول تجربة ليها علشان ميقولوش ان بنته دخلت الفن بالواسطة لكن لما لقاها مصرة تمثل وافق على طلبها.
