الفنان محمد رمضان يعيش حالة من السعادة بسبب النجاحات الكبيرة التي يحققها سواء على مستوى الدراما التلفزيونية أو حتى على مستوى السينما، لأنه قدر يقدم عملين هذا الموسم ، كل واحد منهم حقق نجاح كبير جدا، وهما مسلسل جعفر العمدة، ومن بعده فيلم هارلي أسطورة الأسفلت وكل واحد منهم قصة لوحده ولكن المشترك بينهم هو النجاح.
بالتأكيد الفنان محمد رمضان حاليا متربع على عرش الفن في مصر، لأنه بيحقق أعلى الأرقام وردود الفعل سواء كان في شباك التذاكر أو حتى على مواقع التواصل الاجتماعي، وده من خلال أعماله اللي بيقدمها وبتنال استحسان الجمهور بشكل كبير.
وطبعا الفنان محمد رمضان قدم مؤخرا في موسم رمضان مسلسل جعفر العمدة واللي مثل حالة مبنشوفهاش كتير من ناحية النجاح اللي وصفه البعض بإنه أسطوري، وده بسبب رودود فعل الجمهور المبالغ فيها ناحية العمل، والتفاعل حتى مع نجوم العمل وفي الشارع، وكأن القصة حقيقية مش مجرد عمل فني بيقدمه.
والحقيقة إنه برغم المنافسة ووجود أعمال تاني على شاشات التلفزيون، إلا إن محمد رمضان قدر إن هو من خلال مسلسل جعفر العمدة يكتسح النجاح لوحده.
باردو جنب ده كان فيلم هارلي أسطورة الأسفلت، بيحقق أكبر إيرادات خلال موسم العيد ده واللي تجاوزت الـ25 مليون جنيه، عشان يكون تجاوز ضعف إيرادات أقرب منافسيه وهو فيلم يوم 13 من بطولة الفنان أحمد داود.
لكن رغم النجاح المبالغ فيه اللي بيحققه محمد رمضان من خلال الدراما، إلا إن مراجعة خطوات محمد رمضان في السينما بتقول كلام تاني، وإنه مش نمبر وان ولا حاجة لما بيكون في منافسة حقيقية بتواجهه في السوق.
بدايات محمد رمضان وفي ظل الأوضاع اللي كانت حاصلة بعد 2011 وضعف الإنتاج وغيابه بشكل عام، كان وقتها هو الأنجح على الإطلاق وده بأفلامه الألماني وقلب الأسد وعبده موته، ودي فترة مختلفة مكنش فيها منافسة ولا أعمال، وكان رمضان ضحية انتقادات كتير بسبب اتهامه بالتحريض على البلطجة وخلافه.
ولكن بعد كدة لو جينا مثلا لفيلم واحد صعيدي واللي كان بينافسه في نفس الموسم فيلم الجزيرة 2، هنلاقي فيلم محمد رمضان حقق 14 مليون جنيه، في حين إن فيلم الجزيرة 2 قدر إنه يحقق 33 مليون والاتنين كانوا في موسم عيد الفطر.
بعدها قدر إن هو يحقق نجاح معقول من خلال فيلم شد أجزاء في بداية عرضه في وجود منافسة من فيلم ولاد رزق وفيلم أهواك لتامر حسني، وكانت الأرقام قريبة من بعض والفرق بينهم بسيط وكانت إيرادات كل واحد منهم بتدور حوالين 23 مليون، ودي أرقام تقريبية وفي بعض الأوقات تفوق كمان فيلم ولاد رزق.
بعد كدة في موسم عيد الفطر 2017 مقدرش إنه يحقق نجاح كبير بفيلم «جواب اعتقال» في وجود منافسة هروب اضطراري لأحمد السقا وتصبح على خير لتامر حسني، والاتنين كانوا أعلى بكتير في الإيرادات.
بعدها من خلال فيلم آخر ديك في مصر كانت مجموعة الأفلام المتنافسة كلها محققة أرقام ضعيفة وكان وقتها المتفوق فيلم القرد بيتكلم، واحتل محمد رمضان المركز التاني.
في موسم عيد الأضحى 2018 شارك بفيلم الديزل، واللي بيرجع بيه لنوعية أفلام البدايات عشان يحاول يحقق نجاح ملموس، ولكن نافسه وقتها فيلمين مقدرش يصمد قدامهم وهما البدلة لتامر حسني، وتراب الماس لكريم عبدالعزيز، والفيلمين كانوا محققين نجاح أكبر بكتير من محمد رمضان.
