أسماء كثيرة تألقت خلال موسم رمضان الحالي في أكثر من عمل فني، وكتير منهم وجوه كانت موجودة من أكثر من موسم، ولكن بدأنا نراهم بشكلم مختلف.
وده العادي، كل موسم بيكون ليه نجومه، ومن بين نجوم الموسم ده الفنانة الشابة لمى كتكت، واللي عاملة دور مميز جدا في مسلسل جعفر العمدة.
مسلسل جعفر العمدة مسمع جدا الفترة دي بين الجمهور سواء على السوشيال ميديا أو بشكل عام، وهو من أكتر الأعمال اللي عاملة تأثير كبير مع الجمهور، وعامل حالة تفاعل كبير، وده اللي بيخلي كل نجوم العمل دلوقتي ظاهرين للناس وبقوا تريند طول الوقت لأنهم جزء من الدراما الأكثر تأثيرا في الموسم.
شوفنا نجوم كتير خلال العمل متألقين، وبنسلط الضوء عليهم وعلى أدوارهم طول الوقت، وطبعا الجمهور بيبقى مهتم يعرف هما مين وبيعملوا ايه، ورغم إن كتير منهم معروفين لينا، ولكن لأن مساحة الجمهور المتابع ليهم بقت أكبر، فحبينا إننا نتكلم عنهم.
الفنانة لمى كتكت، بتقدم خلال مسلسل جعفر العمدة، دور البنت اللي كان مرتبط بيها سيف اللي بيعمل دوره الفنان أحمد داش، وبنت الفنانة فريدة سيف النصر، اللي بتعمل دور عزيزة الرقاصة، ولمى هنا في المسلسل متربية في بيت عوالم وبالتالي الدور بيكون ليه طبيعة خاصة في طريقة الكلام والتفكير.
قدرت الفنانة لمى كتكت إن هي تقدم الدور بشكل مميز، وده اللي خلا الجمهور يتفاعل معاها، ويعلق على كتير من تصرفاتها، من بينها مثلا لما سيف قالها إنه عايز ياخد الهدايا اللي جابهالها عشان مبقاش معاه فلوس، ودي كانت طريقة منه عشان يحاول يخلع منهم بناء على نصيحة جعفر العمدة، وكان رد فعلها إنها قالتله لا مش عايزين، اتكل على الله.
بتظهر بلوك طول الوقت حاطة روج تقيل جدا، وميك أب تقيل بشكل عام، ولبسها متناسب مع الشخصية، مع طريقة الكلام الشعبية شوية في النطق، وكمان التحرر الزايد عن اللزوم.
الفنانة لمى كتكت، من مواليد سنة 1994، وهي من أب أردني وهو المنتج إسماعيل كتكت، وبنت الفنانة المصرية أمل رزق، وهي دارسة في معهد الفنون المسرحية، وبدأت رحلتها مع التمثيل من خلال عدد من الأعمال المسرحية ولكن كان بدايتها مع السينما من خلال فيلم «الماء والخضرة والوجه الحسن»، وشاركت في عدد من الأعمال الفنية بعد كدة منها «في كل أسبوع يوم جمعة، ضل راجل، ملوك الجدعنة، حرب أهلية، دايما عامر» وأخيرا مسلسل جعفر العمدة.
لمى بجانب التمثيل فهي مهتمة بالرقص، وطول الوقت على إنستجرام بتنزل صور ليها بتبين إنها عندها لياقة بدنية عالية، وهي بتعتبر نفسها فنانة شاملة.
معرضة للاتهام بإنها بتمثل عشان والدتها ممثلة، ووالدها الراحل إسماعيل كتكت كان منتج، ولكن هي بتنفي ده، وبتقول إنها بتشتغل بموهبتها، وبتروح تعمل كاستنج لأدوار كتير لحد ما بتلاقي دور مناسب.
لمى في الأول والدها مكنش عايزها تمثل، ولا هي كانت ناوية، وكانت عايزة تدخل معهد الطيران، ولكن والدتها أمل رزق قدمتلها في معهد الفنون وقد كان.
أول دور مثلته في فيلم الماء والخضرة والوجه الحسن، في الأول رفضته لأنه كان في مشهد قبلة، ولكن بعد تعديل الدور وافقت وشاركت في العمل.
لمى اتخطبت للفنان محمد الشرنوبي سنة 2016، لمدة 9 شهور، ولكن بعد كدة حصل الانفصال ما بينهم، وكانت قابلت الشرنوبي ولعبت دور حبيبته فيلم الماء والخضرة والوجه الحسن، وبالفعل حبوا بعض في الواقع واتخطبوا ولكن الخطوبة مكملتش.
