كشف أستاذ الجراحة بطب قصر العيني الطبيب وائل غفير المعالج للمطربة أنغام، تفاصيل جديدة عن حالتها الصحية، وذلك خلال مداخلة هاتفية في برنامج “الحكاية” الذي يقدمه الإعلامي عمرو أديب.
وقال الدكتور وائل: نطمن جدا الحمد لله، الأمور بتتحسن كل يوم، النهاردة أحسن بكتير قوي من إمبارح وأول إمبارح، إحنا ماشيين في العلاج التحفظي، قدامنا يوم أو بالكتير اتنين، والأمور ترجع طبيعي إن شاء الله”.
وتابع: هي كانت عاملة عملية أمراض نسا، وبعدين حصل التصاقات في الأمعاء مع مكان العملية، ودي حاجة بتحصل مع كل العمليات الجراحية اللي في البطن، الالتصاقات دي بتؤدي لانسداد معوي، بنعالجها علاج تحفظي، وهتفك، الأغلبية بتفك أكتر من 85% بيفك بالعلاج التحفظي، اللي هو تركيب الخرطوم من المناخير لغاية جوا المعدة، ومحاليل والدنيا بتفك، فيه طبعا نسبة صغيرة مش بتفك وبتستدعي تدخل جراحي تاني وإحنا مش بنفضله، على أساس إن العملية التانية برضه هي عملية، فممكن برضه تؤدي لالتصاقات فبنحاول على قد ما نقدر منعملش عمليات، وماشية الأمور بتتحسن”.
وأضاف: “هو مش شلل في الأمعاء، هي الأمعاء بتروح تلصق في مكان العملية الأخرى، سواء هي زايدة أو مرارة، فبتروح تلصق في الحتة بمرور الوقت بعد يوم أو خمسين، فتروح المصارين لافة فلما بتلف بتتسد انسداد ميكانيكي، مش بتتشل، شلل المصارين دي قصة أخرى، ونقدر نقول 80% من الانسداد عند الفنانة أنغام، وبنعملها كل الأشعة وبنشوف درجة الانسداد، والحقيقة فيه تحسن هايل، لسه مش 100% لكنه تحسن متوقع وأحسن من المتوقع كمان وأسرع، إحنا على بكره أو بعده تكون الدنيا فكة، وهي لسه خلاص مش بتتألم لإن مفيش مغص، وهي كمان يومين أو تلاتة تقدر تغادر المستشفى”.
