كشف الفنان فريد النقراشي، حقيقة وفاة الممثلة اللبنانية دينا حرب وذلك بعد اختفائها لسنوات، موضحًا أنها ما زالت على قيد الحياة بالرغم من كتابة تاريخ وفاتها عبر جوجل، وهو الأمر الذي أثار استيائها على حد قول النقراشي.
وكتب فريد النقراشي، عبر حسابه بـ فيس بوك: دينا حرب ماتت ولا لأ، للي مش فاكر الممثلة اللبنانية (دينا حرب) هي اللي كانت مع محمد فؤاد في فيلم (غاوي حب) وشاركت في فيلم (45 يوم) وفيلم حلم العمر، وأمن دولت، وجدو حبيبي، وغيرها، ولو دخلت وكتبت أسمها على Google هيطلعلك تاريخ ميلادها وتاريخ وفاتها، لكن المفاجأة بقى من كام يوم لقيت (دينا حرب) بتكلمني من لبنان وهي عايشة هناك حاليا مع أسرتها، أيوه دينا (المرحومة) اللي خبر وفاتها منتشر اتصلت بيا وكانت متضايقة جدًا ومش فاهمة ليه خبر موتها (وهي عايشة) منتشر بالشكل ده.
وأضاف فريد النقراشي، أن دينا حرب تواصلت معه خلال الفترة الماضية، قائلًا: أيوه زي ما أنت سمعت هي عايشة بالرغم زي ما قلتلك لو كتبت على محرك البحث Google اسمها هيطلعلك تاريخ ميلادها وتاريخ وفاتها، هي كانت مستغربة ومش فاهمة ومتضايقة جدًا وحاسه إن أكيد فيه حد ورا الإشاعة دي، بس مش عارفه ليه يطلع عليها إشاعة بالشكل ده، وليه تتحول لمعلومة رسمية تتكتب على كل المواقع بمجرد أنك تكتب أسم دينا حرب.
واستكمل: لما دورت اكتشفت عبث السوشال ميديا إللي إحنا بقينا عايشين فيها وبيها.. فيه خبيرة تجميل ليها نفس الاسم (دينا حرب) وماتت مخنوقة الله يرحمها نتيجة تسرب غاز في منزلها، وانتشرت صورة دينا حرب الممثلة بدل خبيرة التجميل وقالوا إنها ماتت مخنوقة بنفس تاريخ وفاة خبيرة التجميل.
واختتم النقراشي: شيء مؤلم وجارح أن كل الناس تتداول خبر وفاتك وتكتبه وتوثقه وأنت على قيد الحياة حي ترزق، ياريت نتحرى الدقة بالذات في المعلومات اللي من النوع ده قبل ما نكتبها، ورجاء تصحيح الخطأ (دينا حرب) الممثلة عايشة وبصحة جيدة وربنا يديها طولة العمر، معلش يا دينا ألف مليون سلامة عليكي من الموت وربنا يديكي طولة العمر.
