فن و مشاهير

فنان عالمي ينتظر مولوده الجديد بعد تخطي عمر الـ 80

كلنا في مصر والدول العربية عارفين النجم العالمي آل باتشينو وبنحب نتفرج على أفلامه ويمكن كمان أعماله محفوظة عند ناس كتير مننا.

.لكن الحياة الشخصية لآل باتشينو مليانة أحداث وحكايات كتيرة واتفاجئنا كلنا من كام ساعة إنه هيكون ليه ابن من أصول عربية وده نتيجة علاقته بحبيبته الكويتية.. مين اللي هتكون سعيدة الحظ دي اللي اسمها هيتكتب في التاريخ وإيه حكايتها مع النجم العالمي وعلاقتها إيه الرجالة الكبار في السن عمومًا.. كل ده وأكتر هتعرفوه معايا في التالي:

اللي يعيش ياما يشوف

يا ألف نهار أبيض يا ألف نهار مبروك.. بس بردوا حسرة علينا والله كلنا ملناش غير صوت واحد بس بيقول على الزعيم عادل إمام كفاية عليه كده وكفاية علينا نطمن عليه كل فترة ونسمع صوته ونشوف صورة ليه.

لكن فن خلاص كفاية كده، واللي عايش وشايف اللي بيتقال على عادل إمام هيتعجب لما يعرف إن النجم العالمي آل باتشينو، اللي من نفس سنه مستني مولود جديد ليه في الطريق ومراته على وش ولادة كمان عشان هي في الشهر التامن وكلها أيام ويكون آل باتشينو عنده ابن من أصول عربية، تخيلوا في سنه ده ويخلف أيوه ده اللي حصل وكمان حبيبته دي عندها 29 سنة بس.

حبيبة آل باتشينو

الجمهور مستعجب إن آل باتشينو بجلالة قدره ساب كل بنات بره وبيبص لبنت عربية تكون حبيبته وكمان يخلف منها أكيد لقى فيها حاجة شدته وصراحة حبيبته قمر 14 الجميل كمان إنها معندهاش عقد وإزاي ترتبط براجل أكبر منها والكلام ده لأ دي أصلا بتحب الرجالة الكبار وواخدة على كده.

وحبيبة آل باتشينو كويتية الأصل اسمها نور الفلاح باباها كويتي وأمها أمريكانية، بس حياتها كلها هناك في أمريكا يعني بعد ما اتولدت في الكويت نقلت على هناك علطول، أمها اسمها ألانا وأبوها اسمه فلاح وعنده مجموعة شركات عقارية، وارتباطها بآل باتشينو بدأ في أبريل سنة 2022.

ونور الفلاح درست السينما في جامعة كارولينا الجنوبية وواخدة ماجستير في الإنتاج السينمائي والتلفزيوني، وشغالة دلوقتي منتجة في شركة “سوني” وبردوا هي كمان نائبة رئيس شركة ليندا أوبست.

ومن ناحية التفاعل مع العالم الخارجي والصداقات فهي عندها صداقات كتير جدًا ومن ضمن صداقاتها في الوسط الفني في هوليوود النجم تيموثي شالاميه، ومن أعز أصدقائها المصور جان بيجوزي، وهي بتعتبر الأخت الأكبر لتلات أشقاء تانين هما صوفيا وريمي وناصر.

 بتحب الرجالة الكبار

ونور الفلاح بتحب الرجالة الكبار، وقبل ما تكون مع النجم آل باتشينو، في مواعدة كانت مرتبطة بالمغني البريطاني ميك جاجر، وده يبقى عضو فريق رولنج ستونز، وكانت نور فرحانة بالعلاقة دي جداً وقالت عنها إنها أول علاقة حب جادة ليها وكمان فرق السن ولا يهمها عشان هي مؤمنة بحاجة واحدة بس إن القلب مبيعرفش قبل ما يشوف.

لأ ده بيعرف اللي يحسه وبس، ووصفت علاقتها مع ميك جاجر إنها قضت فيها وقت سعيد بالنسبة لها، ومش بس ميك جاجر اللي نابه من الحب جانب ده كمان واعدت ملياردير اسمه نيكولاس بير جروين وده كمان عدى الخمسين وهي كان سنها 25 بس.

تفتكروا بعد الابن اللي هيظهر للدنيا بعد أيام العلاقة دي تكمل ولا هنشوف فيها دراما وحكايات زي اللي بنسمع عنها ونشوفها بين النجوم.. وقولولنا كمان في الكومنتات تفتكروا إيه اللي جذب آل باتشينو في حبيبته الكويتية وليه اختار يكون ليه ابن منها؟.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى