فنان ومخرج ومؤلف مصري، يمكن الحياة أخذت منه وأعطته وهذا بسبب تهوره وعصبيته، في يوم من الأيام وبعد ما كان نجم الضوء متوجه ناحيته، كان نفس الشيء هو سر لعنته، لأن وجهه معروف، وحياته احولت من إن هو كان النجم المعروف طارق النهري لإنه يكون سجين.. ولكن هو خرج وعاد من جديد وبيقدم 3 شخصيات في موسم رمضان هذا العام
الفنان طارق النهري واحد من الوجوه المعروفة طبعا على الشاشة، هو ممثل ومؤلف ومخرج، ليه أعمال كتير في مسيرته، واللي بتتخطى الـ100 عمل فني، ولكن طبعا محدش يقدر ينسى «الطريق إلى إيلات» الفيلم الملحمي اللي كان مشارك فيه النهري.
الفنان طارق النهري من مواليد 1952، وهو خريج كلية التجارة، بعدها دخل المعهد العالي للسينما، في وقت من الأوقات فاز بلقب الممثل الأول في مسابقة الوجوه الجديدة في إسكندرية سنة 1973، عشان يبدأ حياته ممثل في التلفزيون.
النهري بعد كدة أخرج مجموعة أغاني وأفلام زي (الغاضبون، الكاشي ماشي، لو كان دا حلم)، كمان كتب سيناريوهات أفلام وسهرات التلفزيونية زي (الأب الثائر، الشجعان).
ولكن هيفضل الجانب الأكبر من مسيرته هو كممثل، لأنه شارك في عشرات الأعمال الفنية ومن أبرزها (الشوارع الخلفية، الطريق إلى إيلات، الكرنك، خاتم سليمان).
الفنان طارق النهري بيشارك خلال موسم رمضان الحالي من خلال 3 أعمال درامية وهي مسلسلات جعفر العمدة وضرب نار وسوق الكانتو، ويمكن دوره في جعفر العمدة هو الأشهر والأبرز، لأنه هو يعتبر المسسل اللي عامل حالة قلق كبيرة على السوشيال ميديا خلال الفترة اللي فاتت وهو من بطولة النجم محمد رمضان، ومن إخراج محمد سامي.
طارق النهري بيلعب دور حما محمد رمضان، قبل ما يكون في ينهم خلافات عائلية كبيرة جدا، انتهت بموت واحد من أبناء طارق النهري في المسلسل وسجن التاني.
الفنان طارق النهري معظم دوره مفيهوش كلام كتير، وهو عبارة عن تعبيرات كلها حسرة بسبب ابنه كارم فتح الله، اللي بيقدمه الفنان أحمد عبدالله، واللي طول الوقت جايبله الفضيحة وعاملة مشاكل مع جعفر العمدة.
الفنان طارق النهري حياته فيها قصة يمكن كتير مننها عارفينها ودي لما تم القبض عليه في واحدة من القضايا الشهيرة، وبالفعل اتحبس في 2012، ولكن خرج على ذمة القضية، لحد ما صدر حكم ضده وآخرين بالمؤبد، واستأنف في الحكم، عشان المحكمة تقبل ويتحكم عليه بـ15 سنة سجن، وبالفعل بدأ تنفيذهم، ولكن بيتفاجئ الفنان طارق النهري بصدور قرار عفو رئاسي عنه، عشان يخرج بعد سنتين وكام شهر من فترة عقوبته ويشوف النور من جديد في يوليو 2022.
الفنان طارق النهري بيقول إنه لما عرف الخبر من كتر الفرحة قلبه وقف، واتعمله إنعاش عشان يفوق تاني ويرجع للحياة، بيقول إن دي فترة كانت صعبة عليه جدا، كأنه عايش في تابوت، ولكن بيحمد ربنا إنها فترة وعدت، وإنه لازم يصلح اللي جاي من حياته، ويهتم ببيته وأسرته.
