محمد فؤاد غاب عن الأضواء الفترة الماضية، بسبب قلة اعماله الفنية، ولكن عندما عاد وظهر أحدث ضجة كبيرة ، فما سر هجومه على طارق الشناوي وكيف هو أبو رامز جلال؟ تابعونا لمعرفة التفاصيل:
ناس كتير متعرفش إن رامز جلال يعتبر ابن محمد فؤاد، فيه بينهم فرق سن كبير وكمان والد رامز جلال وصى محمد فؤاد عليه، وده اللي خلى الفنان محمد فؤاد يروح برنامج رامز وميعملش حساب للفلوس ولا حتى لكلام الناس، مش بس كده ده كمان فؤش شاهد على كتب كتاب رامز، وهو عيلة رامز أسرة واحدة، يمكن ليه شوية تحفظات على برنامج رامز، ولكنه في النهاية ميقدرش يرفض لرامز طلب.
الفنان محمد فؤاد كمان كان عنده برنامج مقالب إسمه فؤش، وكان برنامج مشهور جدا، مش بس كده، فؤش كمان كان عاوز يوصل رسالة من خلال برنامج بتاعه وإن ممكن المقلب يتم لكن من غير إهانة حد، حتى لو الفنان مش كبير في السن، الاحترام أهم حاجة.
فؤاد يجري 3 عمليات جراحية
مش كل الناس تعرف إن الفنان محمد فؤاد عمل 3 عمليات تكميم معدة عشان يخسر وزنه الزيادة، وده اللي قاله مع الإعلامية بسمة وهبة، كمان فؤش استغرب إن الناس بتتكسف من ده، وبسبب كلام الناس كان خايف يعمل العملية من البداية وحتى عياله كانوا خايفين عليه، وفي الآخر عملها وارتاح بعدها، وقال ” مش فاهم المجتمع بتاعنا عاوز يروح لفين؟! مجتمعنا بقى يتلون لطباع معتقدش إنها هتروح للخير؟!”.
طارق الشناوي يهاجم محمد فؤاد
الناقد الفني طارق الشناوي طلع قبل كده وهاجم الفنان محمد فؤاد وقال عنه إنه شبه سيد قشطة، وده لأن فؤش بسبب مرضه الأخير وزنه زاد بشكل كبير، ودي مكانتش المرة الأولى اللي يهاجم فيها الشناوي فؤش، ده هاجمه قبل كده بسبب فيلم إسماعيلية رايح جاي ووصفه بإنه بقايا الطفل.
فؤش مسكتش وقال إن طارق الشناوي مش متربي وإنه كان ممكن يسنجه لكنه تمالك أعصابه ورفض يعمل ده، مش بس كده فؤش قال إنه ميقدرش يوصف حد بالوصف ده، وكان ببساطة ممكن يوصفه بالقرد، لكن أخلاقه مسمحتش بده.
فؤاد في باريس
كمان فؤش قال إن فيلم إسماعيليه رايح جاي كان معروض في كل السينمات، ووقتها الشانزلزيه كان واقف والبوليس مكنش قادر يسلك الشوارع من الجمهور، وبسبب الفيلم ده الناس كانت نايمة في الشوارع في فرنسا، فتخيلو في مصر كان عامل إيه،
محمد هنيدي في عيون محمد فؤاد
بعد فيلم إسماعيلية رايح جاي حصل خلاف بين الفنان محمد فؤاد والفنان محمد هنيدي، والأزمة كبرت لدرجة إن فؤاد قال إن ندمان عشان ساعد هنيدي، مش بس كده ده قال إنه خسر فلوس كتير وأجل شغل كتير وراه، والناس كانت رايحة عشان تتفرج على فؤاد، واكتشفوا صدفة وجود هنيدي، كمان محمد فؤاد كان خايف إنه يدخل فيلم جديد وينجح والنجاح ده يدايق حد.
الفنان محمد هنيدي رد على تصريحات فؤش وقال إن مفيش أي خلاف بينهم، وإنه مش عارف إيه اللي حصل غير إنه اشتغل معاه ونجح بسببه الفيلم ده، ومحدش يقول إن هنيدي أو فؤاد سبب النجاح، ربنا هو السبب، ودايما كنا بنقعد مع بعض بعد أي تصريح، لكن بعد كده الاقيه اتكلم في حقي وحش ومعرفش ليه.
