ضجة كبيرة انتشرت في الساعات الماضية بسبب نتيجة « جوائز النقاد للدراما العربية»، والتي ظهرت مسلسلات وفنانين كانت أدوارهم الأسوأ في رمضان، من هم هؤلاء الفنانين ؟ ولماذا كانت هذه نتيجتهم؟ تابعونا لمعرفة التفاصيل:
نبدأ بالنجم مصطفى شعبان والفنانة ريهام حجاج واللي الجمهور اختارهم كأسوأ ممثلين في رمضان 2023، وده اللي كان صدمة لناس كتير، ويمكن ناس كتير شككت في النتيجة، لكن لجنة جوائز النقاد قالت إن ده كان اختيار الجنهور وتصويتهم، وظي ما ناس كتير اختارت مسلسل ضرب نار هو الأفضل، اختاروا مسلسل بابا المجال هو الاسوأ
محمد سعد مبقاش ملك الكوميديا
كمان كان من ضمن النتيجة إن ملك الكوميديا محمد سعد واللي كسر الدنيا بأفلامه ومسلسلاته ومسرحياته، النهارده محدش بيقول على محمد سعد غير ياحسرة، وخصوصا بعد مسلسل إكسلانس واللي مكنش فيه غير مخرج النقاد قالوا عنه إنه على الله حكايته، مش بس كده النقاد كمان قالوا إن محمد سعد عمل المسلسل ده مخصوص عشون يكون هو اللي مسيطر على كل حاجة، سواء الممثلين أو المخرجين أو حتى التأليف، والنتيجة إن مسلسل إكسلانس كان مليان إفيهات من سنين طويلة محدش بيقولها تاني ولا بقت تضحك.
يسرا جاية تهزر
وكان في المركز التاني الفنانة يسرا، واللي ناس كتير على السوشيال ميديا قالوا إنها جاية تهزر، أو جاية تقضي وقت فراغها فب مسلسل 1000 حمدا الله ع السلامة، واللي جمهور كتير انتقده في كل شيء، ماعادا عنبة واللي كانت أول تجربة ليه، الجمهور قال إن القصة كانت متكررة والإفيهات قديمة جدا، وده اللي خلى الموضوع ممل.
عمرو يوسف صدم الجمهور
ومختلفش الموضوع عند الفنان عمرو يوسف، واللي قدم شخصية المقدم نور صلاح عزب في مسلسل الكتيبة 101، واللي كان صدمة للجمهور، وقالوا إنه مش مناسب للشخصية وأوفر جدا، مش بس كده الجمهور قال إن اللي نجح المسلسل شوية هو آسر يس وشخصيته في آخر الحلقات.
مايان السيد وروجينا
أما مايان السيد فالنقاد قالوا إن الأداور اللي قدمتها السنادي مش مناسبة ليها خالص، والجمهور قال إن حركاتها كانت مصطنعة، وده ميمنعش إن ليها أداور فنية قبل كده جميلة جدا وملفتة وهي اللي صنعت تاريخها، مش بس كده الجمهور كمان انتقد سمايل هوليوود بتاعت روجينا في مسلسل ستهم، وقالوا إزاي ست شقيانة وعاملة دور راجل تكون سنانها بيضا وبتلمع أوي كده.
جعفر العمدة
وحتى مسلسل جعفر العمدة مسلمش من كلام الجمهور رغم إنهم المسلسل نجح جدا، وقالوا إن سيف ابن جعفر طول المسلسل جنبه و لو كان بص وراه كان شافه، مش بس كده ده كمان الجمهور قال إزاي بلال شامة تخبطه عربية وتدوس عليه ويدوب في النهاية شوية كدمات، ده احنا عدينا المسلسلات الهندي.
مسلسل الأجهر
ونيجي لعمرو سعد في مسلسل الأجهر، اضرب بالنار وطلقات كتير جدا ولكن في النهاية مفيش رصاصة جت فيه، وكل ده ومعاه الإفيهات اللي ملهاش معنى والجمهور مكنش فاهمها زي الأبيض على الأبيض، والأحلى ع الأحلى.
