تابعنا خلال الفترة الماضية الكثير من الجدل حول الإعلامية ياسمين عز، والشكاوي المقدمة ضدها بسبب تصريحاتها عن الرجال ولكن المشكلة الكبيرة الآن أنها معرضة للمنع من الظهور على التلفزيون مرة أخرى.
في البداية ياريت ماتزهقوش مننا بس شكل الموضوع ده مكمل شويه وأحنا عايزين نتابعكم بكل جديد، طبعا أنتم عارفين أن الدنيا مقلوبة على الإعلامية ياسمين عز، وعليها شكاوى من جهات كتير، النهاردة قررت نقابة الإعلامين المصرية إحالتها للتحقيق معاها، عايزين يعرفوا هي خالفت شروط العمل فى البرنامج بتاعها على التلفزيون ولا لأ، وده اللى ممكن بالفعل يوقف برنامجها زى ماقولنا في بداية الفيديو لو ثبت الكلام ده عليها فعلا.
أنتم عارفين طبعا أن نقابة الإعلامين المصرية ليها الحق أنها توقف إى إعلامى مصري عن الظهور في التلفيزيون لو شافت أنه غلطان في حاجة، وممكن تعمل كدا فعلا مع ياسمين عز لو شافت أنها غلطانة في أي كلام قالته على التلفزيون خلال الفترة اللى فاتت، واللى أغلبه كان حلو في حق الرجالة، وشكل الستات زعلانين من كدا.
الهجوم اللي حصل على ياسمين عز الفترة اللي فاتت خلى نقابة الإعلاميين تحولها للتحقيق لكن الامر مش هيتوقف عند أنها مش هتظهر في التلفزيون تاني وخلاص.. لكن الأمر هيوصل للحبس كمان لأن فيه مجموعة من البلاغات اتقدمت ضدها بتهمة إثارة البلبلة والرأي العام ودي عقوبتها ممكن توصل ل١٠ سنين حبس.
لو فاكرين، فالمجلس القومى للمرأة، طلع خلال الأيام اللى فاتت وقال أن ياسمين عز بتتكلم بشكل مش مظبوط عن العلاقة بين الراجل والست، وطالبوا بوقف برنامجها، وفيه كام واحدة ست كدا في صف موقف المجلس القومى للمرأة، زى الفنانة فيفى عبدة، لما طلعت وقالت لياسمين “انتى بتحبى الرجالة كدا ليه”.
الغريب بقى أن ياسمين عز واقفة واقفه أنما أيه، ولا هممها حاجة، وطلعت ردت إمبارح على الكلام اللى اتقال أن البرنامج بتاعها ممكن يتوقف، وقالت “لا أبدا” وغمزت بعنيها كدا، تحس أنها بتكيد كل اللى بيطالب بوقف البرنامج.
وكمان أكدت أن البرنامج بتاعها مكمل في مواعيده الثابتة اللى معروفة عنه، من الخميس للحد الساعة 6 بليل على قناة أم بي سي مصر.
إحنا حابين نعرف رأيكم دلوقتى، أنتم مع ياسمين عز وأنها مش هتتوقف، ولأ انتم مع التحقيقات اللى مطلوبة فيها وشايفين أنها ممكن تكون قالت حاجة مش كويسه في حق الستات، عرفونا رأيكم في التعليقات.
