استعان بفريق طبي وسيارة إسعاف مجهزة على أعلى مستوى، الخسائر بالجملة والضيوف من المقلب للمستشفى.. مشاهد مسربة من برنامج رامز جلال في رمضان 2024:
إزاي ريم طارق وحسن شاكوش اتصالحوا؟.. وليه لعيبة الأهلي والزمالك اتخانقوا مع بعض؟.. وإيه المفاجأة الجامدة جداً عن محمد صلاح وكريستيانو رونالدو؟.. كل دي حكايات وأسرار لما تسمعها في الفيديو ده هتعيش البرنامج من أول حلقة لآخر حلقة.. فـ يلا بينا على التفاصيل.
محدش يتخيل إن برنامج بحجم مقالب رامز جلال يتغير 180%رجو السنة دي كده.. وبعد ما كان بقاله كام سنة كده مش عاجب أغلب الناس.. السنة نازل يعمل سيزون قوي جداً هيعدي بيه الحدود ويجيب مشاهدات تغطي تكلفة البرنامج السنة دي والسنة اللي جاية كمان.. الفكرة مطرقعة جداً والضيوف غير متوقعين بالمرة.
هيتصالح ناس ويتخانق ناس تانيين.. بس رعب المقلب خلى الضيوف يتنقلوا على المستشفى عشان يعالجوا إصاباتهم بعد ما خلصوا تصوير الحلقة ومشيوا رغم إن البرنامج فيه تجهيزات طبية على أعلى مستوى فريق طبي متكامل وعربية إسعاف ضخمة.
في مشاهد من البرنامج كشفها الصحفي هاني عزب عن الضيوف وتفاصيل الفكرة والمصابين.. يعني الضيف وهو رايح البرنامج هيبقى عارف إنه برنامج مقلب رامز جلال بس مش هيبقى عارف طبيعة المقلب ورامز جلال بيظهر بشخصيته الحقيقية.
المقلب هيكون عبارة عن اتنين في بينهم منافسات أو خناقة زي ما هنشوف حلقة فيها مي عمر مع نجلاء بدر ومحمد الشرنوبي مع سارة الطباخ وطبعاً دول بينهم مشاكل وصلت المحاكم كمان حسن شاكوش مع طليقته ريم طارق وبينهم بردوا مشاكل كبيرة جداً وصلت للمحاكم والكلام الرايح جاي بعد جوازة 55 يوم بس.
الضيوف كمان بينهم نسرين أمين ويسرا اللوزي وكمان هدى المفتي وأحمد مالك.. هتشوفوا سمية الخشاب مع آيتن عامر.. والتقيلة بقى هتكون في حضور مها أحمد وفادي خفاجة في حلقة واحدة وافتكروا معايا كده اللي حصل بينهم على التيك توك.
كمان هتشوفوا حمدي الميرغني ومراته في حلقة واحدة.. ده غير بقى إن كهربا لعيب الأهلي طالع مع عبد الله السعيد لاعب الزمالك دلوقتي.. وإمام عاشور هيظهر في حلقة واحدة مع أحمد حسام ميدو وأقوى اتنين مدافعين في مصر هيظهروا في حلقة واحدة وهما الونش وعبد المنعم، وهتشوف نجوم كورة كتير جدا السنة دي.
برنامج رامز جلال السنة دي فيه إصابات كتير وأقل إصابة هتبقى كدمات متفرقة في الجسم.. الفنانة مها أحمد اتصابت بإصابة كبيرة جدا في رجليها وكمان شيرين رضا وسمية الخشاب.
وده بعد ما ألعاب في البرنامج اتسببت في اللي حصل.. ومراحل مقلب رامز جلال هيبدأ لما الضيف يوصل رامز هو اللي هيستقبله بنفسه وهو بيتكلم مع الضيف.. هوب الضيف هيقع في زحليقة فيها ماية مش نضيفة وبعدين هيلاقي تمساح وكلب شرس جداً وبعدين هيلاقي الضيف التاني اللي معاه في الحلقة.. ودي ما حظك يطلع بقى منافس ولا واحد في خلاف بينك وبينه.
المفاجأة الأكبر بقى إن كريستيانو رونالدو مش موجود في البرنامج ولا هيكون ضحية لرامز جلال زي ما اتقال ولا أي حاجة.. وكلام السعوديين عن كريستيانو وإنه ضحية في البرنامج طلع فنكوش.. استنى استنى خد التقيلة دي كمان.. يا للي فاكر إن محمد صلاح هيكون مفاجأة البرنامج انسى يا حبيبي.
والفيديو اللي كان متداول عن ظهور صلاح ورامز من كواليس البرنامج ده مش حقيقي وهما كانوا اتقابلوا في حملة لا للممنوعات اللي كان بطلها محمد صلاح السنتين اللي فاتوا.. ومفيش مو في البرنامج اطمنوا.
واتعرض لـ رامز جلال في رمضان 2023 برنامج رامز نيفر إند على شاشة قناة MBC مصر وده كان بالتعاون مع الهيئة العامة للترفيه في المملكة العربية السعودية ومن بين اللي وقعوا ضحايا في البرنامج كتير من نجوم الفن والإعلام زي الإعلامية ياسمين عز واللي حلقتها اتتصدرت تريند مواقع التواصل الاجتماعي ده غير حلقة الفنان أحمد السقا واللي عملت جدل كبير بسبب أكله للثعبان في الحلقة.
كمان وقع في الحلقة دي محمد فراج ومراته بسنت شوقي ده غير مصطفى كامل نقيب المهن الموسيقية والفنان محمد فؤاد وخبيرة الإتيكيت أمينة شلباية وشيماء سيف ونسرين أمين وإيمان العاصي ووفاء عامر ومحمد الغيطي ورضا عبد العال ومحمود كهربا وغيرهم.
