فن و مشاهير

موهبة منة شلبي تنتصر على أزمتها الشخصية واحتفاء قوي بمسلسل “تغيير جو”

الفنانة منة شلبي أصبحت تميمة نجاح كل رمضان، مهما فعلت في حياتها الشخصية وأزماتها أصبحت كثيرة، وقت العمل تركز وتقدم أعمال ومسلسلات تجعلها نرقم واحد في مجالها، صحيح تعرضت لأزمة تهز أي جبل.. لكنها كانت ثابتة وتعمل في صمت حتى عادت من جديد وبقوة.

احنا لسه مبدأناش شهر رمضان والإشادات بمسلسل منة شلبي الجديد “تغيير جو”.. مالية مواقع التواصل الاجتماعي.. بعد ما اتنشر البرومو الدعائي ليه.. وواضح إنها محضرة حاجة مختلفة كعادتها يعني.

ناس كتير كانت فاكرة إن منة شلبي مش هترجع من أزمتها بسهولة.. وكلام كتير إتقال عن إنها هتعتذر أو مسلسلها مش هيكمل.. أو إن شركة الإنتاج مش هتغامر باسمها خصوصا بعد ما اتحكم عليها بالسجن مع إيقاف التنفيذ.

لكن لسه في خير في الدنيا.. ولسه في ناس مبتعاقبش الإنسان على غلطة أو هفوة أو حتى موقف صعب مر بيه سواء بإرادته أو الدنيا فرضته عليه.. ومنة شلبي خير مثال على الموضوع ده.

منة بعد انتهاء أزمتها وصدور الحكم بحقها في قضية الممنوعات الشهيرة.. سافرت لبنان في صمت.. وبدأت تصوير “تغيير جو”.. والحقيقة إن دعم زمايلها في الوسط الفني كان شيء مبهر جدا.

منة شلبي اللي ظهرت في البرومو بتحاول تعالج وتعتني بوالدتها مريضة الزهايمر اللي بتقوم بدورها الفنانة شيرين.. وقف معاها في العمل ده كاست مهم وتقيل جدا من النجوم.. كلهم جايين يمثلوا في حب منة.. حتى لو جدولهم كان مشغول أو زحمة.

يعني معاها إياد نصار وده نجم مفيش 2 يختلفوا عليه.. ومعاها ميرفت أمين اللي مش بتظهر في أي عمل.. وطالما تواجدت هنا يبقى العمل يستحق ومنة كمان تستحق إنها تخرج من حزنها على وفاة صديقة عمرها دلال عبد العزيز اللي لو كانت موجودة كانت هتعمل كده بالظبط.

كمان معاها السنة دي عصام عمر بطل مسلسل بالطو.. اللي خلاص ركب الناقة وشرخ.. وبعد نجاح مسلسله ودور دكتور عاطف بقى أشهر حاجة على السوشيال ميديا.. راجع تاني لدور ثانوي بس مؤثر جدا في أحداث “تغيير جو”.. وفي مصير نجاح مسلسل منة شلبي في رمضان.

منة من وقت قصير جدا كانت سفيرة لمصر في حفل جوائز عالمي.. الي اترشحت ليه عن دورها في مسلسل “في كل أسبوع يوم جمعة”.. وكانت قريبة جدا من إنها تكون أول مصرية تحصد جائزة “الإيمي” العالمية

حتى مع عدم حصولها على الجائزة كونها وصلت للمرحلة دي .. كان لازم تتقدر جدا.. يمكن اختياراتها الشخصية صعبة ومتهورة.. بس ده ميقللش من موهبتها ومكانتها وسط بنات جيلها والأكبر والأصغر منها كمان
مستنييك يا منة.. ودايما تمتعينا بأدوارك في رمضان وبره رمضان.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى