يواصل نادي برشلونة خطواته الحثيثة لتعزيز صفوفه، وهو يضع عينيه على تحقيق كل الألقاب في الموسم الحالي.
الفريق الكتالوني، بقيادة المدرب هانسي فليك، يضع خطة محكمة لتقوية خط الدفاع في فترة الانتقالات الشتوية القادمة، في محاولة لإعادة هيبته إلى القمة الأوروبية والمحلية.
الدفاع أصبح الهاجس الأكبر لفليك، اللي طالب إدارة النادي بضرورة جلب مدافع من العيار الثقيل.
وفي الوقت ده، يبرز اسم المدافع الإنجليزي مارك غويهي، نجم كريستال بالاس، كأولوية قصوى على قايمة برشلونة.
غويهي، البالغ من العمر 25 سنة، يُعتبر واحد من أفضل المدافعين في الدوري الإنجليزي، بفضل سرعته، ذكائه في قطع الكورة، وقدرته على قيادة الدفاع.
عقد غويهي مع كريستال بالاس هينتهي في صيف 2026، لكنه رفض عروض التجديد مع ناديه، وده اللي خلّى برشلونة يشم ريحة فرصة ذهبية.
لو ما جددش عقده، ممكن النادي الكتالوني يضمه في يناير بمقابل مادي معقول، وهي صفقة تُعتبر مثالية في ظل الأوضاع المالية للفريق.
التقارير بتقول إن كريستال بالاس نفسه يفضل بيع اللاعب لنادي خارج إنجلترا زي برشلونة، بدل ما يروح لمنافس زي ليفربول، اللي حاول ضمه في الصيف اللي فات من غير ما ينجح.
غويهي مش بس لاعب أساسي في منتخب إنجلترا، لكنه كمان يناسب أسلوب فليك زي اللبس المفصّل.
سرعته وقوته في التدخلات هتضيف توازن لدفاع برشلونة، اللي عانى من غياب الاستقرار في الفترة الأخيرة.
مع إصابات متكررة لبعض المدافعين وانتهاء عقد إنيغو مارتينيز، إضافة إلى شكوك حول مستقبل كريستنسن، غويهي ممكن يكون الجوكر اللي يحل المعادلة الصعبة.
فليك، اللي أثبت من أول يوم إنه جاي بطموح كبير، شايف إن غويهي هو الشريك المثالي للنجم الصاعد باو كوبارسي في قلب الدفاع.
الثنائي ده ممكن يكون النواة اللي برشلونة بيحلم بيها عشان ينافس على دوري أبطال أوروبا والليغا.
إدارة النادي بتخطط لتقديم عرض رسمي في يناير، مستغلة موقف كريستال بالاس اللي مش عايز يخسر اللاعب ببلاش لو انتهى عقده.
الصفقة دي، لو تمت، هتكون بمثابة إعلان نوايا من برشلونة: إحنا جايين نكتسح
إصرار فليك على ضم غويهي بيوضح رؤية الفريق للمستقبل، وهي رؤية مبنية على دفاع صلب وطموح لا يتوقف.
الجماهير الكتالونية على أحر من الجمر، منتظرة إعلان الصفقة اللي ممكن تغير موازين القوى في السباق على الألقاب.
