فن و مشاهير

تهم تلاحق خالد يوسف بسبب “سره الباتع” فما القصة؟

دائما اعمال المخرج خالد يوسف تتسبب في حالة كبيرة من الجدل ، وظهر ذلك منذ عرض أحدث أعماله الفنية مسلسل سره الباتع الذي تعرض للكثير من الانتقادات.
يعني الراجل يغيب يغيب ويرجع يقلب الدنيا كده من أزمة رانيا التومي لشمس الكويتية وميلحقش الجمهور يفوق إلا ويلاقي المؤلف الموسيقي المعروف راجح داوود بيتكلم عن استخدم خالد لموسيقى غير اللي هو عملها لمسلسل “سره الباتع” اللي بيتعرض في رمضان السنة دي وهاتك يا تقطيع في خالد وكلام عن اقتباسات سرقة موسيقى وناس مخدتش حقها في تأليف الموسيقى اللي استخدمها خالد وهكذا.

راجح داوود فجر أزمته مع خالد يوسف

تعالو أحكيلكم إيه اللي حصل.. من كام يوم اتكلم الجمهور على إن الموسيقى اللي عملها راجح داوود في مسلسل “سره الباتع” مش حلوة وإن ربنا كرمه وعوضه في موسيقى مسلسل”رشيد” اللي مكسر الدنيا نجاح، وده اللي خلى راجح يرد في بيان ليه إن في موسيقى استخدمها خالد يوسف في المسلسل مش بتاعته وهو ميعرفش عنها حاجة لأ ووضع خالد بالتحديد في موقف محرج وقال إنه هو السبب في كده مش الشركة المنتجة لإن المخرج هو اللي مسؤول عن حاجة زي كده.

تصعيد الأزمة

بيان راجح داوود كان فيه تصعيد للأزمة وإحراج أكبر لخالد يوسف لما قال إنه اتفاجئ في الحلقة الأولى من “سره الباتع” باستخدام موسيقى كان ألفها لفيلم “الريس عمر حرب”، وطبعًا دي حاجة غريبة على الجمهور إنه إزاي ده يحصل؟، المهم راجح اعترض واتقاله عادي مفيش مشكلة دي بردوا الموسيقى بتاعتك ومخرجه خالد يوسف بردوا، ورغم إن راجح مقتنعش بس سكت عشان يمشي المركب والمسلسل كمان لسه في بداياته، ورغم كده الجمهور مبيرحمش واتهموه إنه بيكرر نفسه وده اللي قابله بالتجاهل لحد ما لقى الموضوع زاد عن حده وخالد كرر جمل لحنية تانية مش بتاعة راجح في الحلقات اللي بعد كده.

راجح داوود يبرئ نفسه

اضطر راجح داوود إنه يبرأ نفسه بقى من اللي بيحصل (ما هو مش معقول بعد التاريخ ده كله يحصل معاه كده)، وقال إن سكوته على نسب موسيقى ليه مش بتاعته جريمة خاصًة وإنه بيحترم جمهوره وبيعتبر ده من صميم احترامه لنفسه، واعتبر إن اللي عمله المخرج خالد يوسف مش صح ومفيش مبرر يخليه يعمل كده رغم إن راجح عمل موسيقى “سره الباتع” وخالد سمعها ووافق عليها.

ياترى بقى خالد يوسف متهم ولا برئ؟

فاجئنا الناقد عصام زكريا ببوست على حسابه في فيسبوك قال فيه إنه بعيدًا عن تقييم مسلسل “سره الباتع” ورأيه في خالد يوسف وشغله لكن من حق المخرج إنه يختار المقاطع الموسيقية اللي هو عاوزها سواء اللي معمولة للمسلسل أو أي موسيقى تانية بشرط مراعاة حقوق الملكية وسداد مستحقات المؤلفين الآخرين والإشارة ليهم في “التترات؛ ورد على راجح داود بإن الموسيقى الخاصة دي بتكون في الأوبرا والحفلات الموسيقية مش في الأفلام والمسلسلات، ولمح إن في تربص بخالد يوسف وإن لو في حالة إعجاب عام بـ”سره الباتع” مكانش حد هيعترض على حاجة حتى راجح نفسه.

تدارك الخطأ الوحيد

عصام زكريا كمل كلامه إن خطأ خالد يوسف والشركة المنتجة كان في عدم نسب الحقوق الموسيقية لأصحابها ويمكن كمان في عدم سداد المستحقات وطالب بعدم خلط الأوراق والكيل بمكيالين، وبعدها علطول قال إنه مع مراجعة تترات المسلسل لقى في شكر للمؤلف الموسيقي أحمد سعد على المقاطع التي استخدمها خالد يوسف ليه واللي هي من أفلام “كف القمر” و”دكان شحاتة”.

موقف خالد يوسف

خالد يوسف بقى مسكتش وطلع في فيديو قال إنه غير منزعج من راجح داوود وإنه من حقه ينبه الجمهور وأكد على إن علاقتهم طيبة ببعض، وكشف عن إن سبب استعانته بموسيقى تانية من أعمال ليه بسبب إن موسيقى راجح مكانتش كفاية وخلصها كلها وكان صعب راجح يعمل موسيقى تانية بحجة إن المسلسل غير الفيلم.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى