انتشرت مكالمة بين شيخ قطري ويحيى الكومي رئيس نادي الإسماعيلي تكلموا فيها عن دعم مالي كبير للنادي، وكان حديثهم عن دعم وصل لـ3 مليون دولار. فما قصة هذه المكالمة وما علاقة رئيس نادي الإسماعيلي مع الشيخ القطري؟ .. تفاصيل كثيرة نكشفها من خلال التقرير التالي:
حالة من الجدل الكبير انتشرت على السوشيال ميديا الفترة اللي فاتت بسبب المكالمة المتسربة بين يحيى الكومي رئيس نادي الإسماعيلي وبين شخص بيقول إنه شيخ قطري!.. الغريبة في المكالمة أن الشخص القطري كانت بيتكلم عن إمكانية دعم النادي الإسماعيلي بالملايين وسط كلام ووعود كتيرة من رئيس النادي من غير ما يتأكد أصلا إذا كان الكلام ده حقيقي ولا لاء.. أو الشخصية اللي معه حقيقية ولا لاء.
يحيى الكومي رئيس نادي الإسماعيلي اللي طلب من الراجل في المكالمة اللي كانت بينهم فلوس وقاله إن النادي محتاج 20 مليون دولار في الموسم عشان يقدر ينافس وأنه بعد مفاوضات وصل أن الراجل هيحوله 3 مليون دولار.. مش بس كده لكن الشخص التاني وهو بيتكلم مع رئيس الإسماعيلي تحول إلى صاحب النادي وبيطلب منه يمشي اللاعب عمر الوحش واللاعب محمد فوزي لأنهم مش بيعرفوا يلعبوا ومستواهم قليل.
الغريبة أن رئيس نادي الإسماعيلي وهو بيكلم الراجل وميعرفش إذا كان حقيقي ولا لاء وافق على كل طلبات الراجل مقابل أنه يحوله الفلوس بدون الرجوع لمدير فني أو أنه يكون في أي خطة للاعبين أو حتى يتواصل معاه بشكل فعلي عشان يعرف حقيقته.
المكالمة دي انتشرت على السوشيال ميديا وبين جمهور النادي الإسماعيلي بصورة كبيرة جدا لدرجة أنها تحولت لتريند والكل بيسأل إزاي النادي الإسماعيلي العريق أصبح بيبتاع دلوقتي عادي بأقل تمن عشان يجي أي واحد يتحكم في النادي مقابل أنه يدفع فلوس.
مع انتشار المكالمة دي كانت المفاجأة لما نشر بعض الشباب فيديو للمكالمة واللي طلعت أصلا مش حقيقية وأن الموضوع عبارة عن وصلة هزار من بعض شباب نادي الإسماعيلي وللي كانوا بيعملوا مقلب في رئيس النادي .. ونشر الشباب فيديو لواحد منهم وهو بيتكلم مع رئيس النادي وإزاي الموضوع طلع كله مقلب عشان يبينوا رئيس النادي على حقيقته وإزاي أنه معندوش اي تفكير أو قرار وبيتحرك مع أي حد مجرد بس إنه يسمع كلمة فلوس.
الفيديو انتشر برضو وسط حالة غضب كبيرة من جمهور الإسماعيلي على السوشيال ميديا مطالبين بإبعاد رئيس النادي عن الإدارة بسبب قلة خبرته وأنه بيمشي ورا أي حد من غير حتى ما يعرف هويته الحقيقة.
