أنت عارف أنك لو من أصحاب المهن الحرة ولاحتى من العمالة غير منتظمة لك حق أن تأخذ معاش عندما تصل لسن المعاشات وستكون مثلك مثل الموظف الحكومي وستحصل على معاش مثله تمام وهذا حسب القانون الجديد للتأمينات والمعاشات.
بس إيه تفاصيل القانون ده؟ ومين الفئات اللي من حقها تقدم على المعاش؟ وإيه هي شروطه والأوراق المطلوبة؟
أصحاب المهن الحرة دايما بيكونوا شيل هم لو حصلهم حاجة وهما معندهمش تأمين ولا سنهم كبر ومفيش معاش يتسندوا عليه، عشان كده بيحاولوا دايما أنهم يأمنوا مستقبلهم، بس خلاص متشلوش الهم لأن أصحاب المهن الحرة بقى ليهم معاش زيهم زي الموظفين، لكن إزاي؟
شوف ياسيدي، الهيئة القومية للتأمين الإجتماعي أتاحت لأصحاب المهن الحرة الاشتراك في التأمينات الاجتماعية، من خلال دفع قسط شهري خاص بالتأمين ده، وبكده هيقدروا بكل سهولة أنهم يصرفوا معاش شهري خاص بيهم لما يبلغوا السن حتى لو مكنش عندهم عمل ثابت.
لكن إيه هي خطوات الأشتراك في التأمين الإجتماعي؟ حسب جريدة الوطن، أول حاجة بتعملها أنك بتقدم نموذج رقم 1 الخاص بالعمالة الغير منتظمة لمكتب التأمينات الموجود في الدايرة بتاعك.
كمان بتقدم صورة من شهادة الميلاد المميكنة للمكتب، وبتقدم صحيفة البيانات الأساسية وبيان من المؤمن عليه بمدد الاشتراك السابقة أو مدى استحقاقك لمعاش تاني.
وبتقدم كمان تقرير اللياقة الطبية أو صورة منه يكون صادر من الجهة الطبية المختصة، ده بالإضافة أنك بتقدم شهادة الملكية أو الحيازة الزراعية الصادر من الجمعية الزراعية أو الجهة المختصة، وبتقدم بيان صادر من مصلحة الأحوال المدنية بتدرج المهنة.
بس مين الفئات اللي من حقها تقدم على المعاش ده؟
حسب اليوم السابع في 17 فئة من حقهم أنهم يقدموا على المعاش من بينهم، الأشخاص اللي بيزاولوا مهنة لحساب نفسهم سواء كانت تجارية او صناعية أو زراعية.
كمان اللي بيشتغلوا في المهن الحرة وأعضاء النقابات المهنية، وكمان الاعضاء المنتجين في الجمعيات التعاونية الإنتاجية اللي بيشتغلوا لحساب نفسهم.
وكمان ملاك الأراضي الزراعية اللي مساحة أرضهم فدان وأكتر، أو حياز الأراضي الزراعية سواء كانوا ملاك أو مستأجرين بالأجرة أو بالمزارعة.
ده كمان ملاك العقارات اللي ميقلش نصيبهم من الدخل السنوي عن الحد الأدني لأجر الاشتراك التأميني من حقهم يقدموا على المعاش، وده طبعا وفقا للائحة التنفيذية للقانون ده.
حتى أصحاب وسايل النقل أو البضايع سواء بري أو بحري أو جوي ليهم الحق في المعاش، ده طبعا غير الوكلاء التجاريين وأصحاب مراكب الصيد الميكانيكية أو الشراعية.
والمفاجأة إن العمد والمشايخ يقدروا يقدموا عليه عادي، والمأذونين والموثقين من غير الرهبان والمرشدين السياحين والأدباء والفنانين، وأصحاب الصناعات المنزلية والبيئية والريفية والأسرية.
ده بالإضافة لورثة أصحاب الأعمال في المنشآت الفردية، وأصحاب شركات الشخص الواحد، وعلى فكرة ممكن يتم إضافة فئات تانية حسب قرار رئيس الهيئة وفقا للقوانين والشروط.
وخد بالك الرئيس السيسي سبق وأمر من أبريل اللي فات بزيادة المعاشات بنسبة 15%، ده غير ان الدولة بتعمل حصر للعمالة غير المنتظمة عشان تزود نسبة المستفيدين من المعاش، ودلوقتي بقى قولنا هتقدم في معاش المهن الحرة ولا لأ؟
