زيادة جديدة في اسعار السيارات، هذه الجملة أصبحنا معتادين عليها، لكن الغريب لما وكيل ينزل زيادة علي عربية موديل 2022 وعربية ماليزيه ليست سيارة براند. تعالو نعرف مواصفات واسعار الماليزية بروتون ساجا.
اول حاجة نتكلم فيها هيا محرك الماليزية، بروتون ساجا بمحرك 4 سلندر، سعة 1300 سي سي تنفس طبيعي
بييطلع قوة حصانية بتوصل لـ 95 حصانًا، ومع عزم دوران 120 نيوتن في المتر.
ومتوصل بفتيس أوتوماتيكي مكون من اربع سرعات ، وبتستهلك العربية 5.7 لتر بنزين لكل 100 كيلو متر.وتانك البنزين فيها سعته 40 لتر، محرك صغير تقليدي عشان يبقي موفر في البنزين.
نتكلم عن تاني حاجة وهيا وسائل الامان و السلامة :والصراحة العربية فيها مجموعة مش بطالة من انظمة الامان من ضمنها 2 وسائد هوائية “آير باجز”،
أنظمة مساعدة الفرامل، خاصية التوزيع الإلكتروني لقوة الفرامل، فرامل مانعة للانزلاق، أحزمة الأمان، ، إنذار ضد السرقة و نظام إيموبليزر ضد السرقة.
وتالت حاجة وهيا العربية من الخارج:العربية شكلها بسيط وهادي من الخارج وفيها تطعيمات من الكروم فالشبكة الأمامية وبتنزل بمرايات كهربائية واشارات في المرايات و حساسات ركن خلفية و مصابيح هالوجين امامية و اضواء نهارية LED ومصابيح شبورة و مصابيح ليد خلفية و سبويلر خلفي.
كمان العربية بتنزل جنوط حديد قياس 15 بوصة مع طاسات بلاستيك و كاوتشات مقاس 185 علي 55والخلوص الأرضي أو ارتفاع العربية عن الأرض بيكون 15 سم، وحجم الشنطة مناسب جدا علي حجم العربية الي مش كبير 413 لتر، و وزن العربية بيوصل 1055 كجم.
نروح لرابع حاجة وهيا العربية من الداخل:بتنزل الماليزية بامكانية فتح وغلق السيارة بدون مفتاح وتكييف يدوي، وتحكم في مقعد السائق بيكون يدويا.
وفيها قفل مركزي وزجاج كهربائي كامل وطارة متعددة الوظائف و كمبيوتر رحلات بشاشة 3.5 انش وكمان نظام إيكو لتوفير الوقود.
وفيها نظام صوتي مكون من 4 سماعات ومدخل AUX وبلوتووث ومدخل USB وشاشة العرض 7٫0 بوصة واخر حاجة و هيا الضمان و الاسعار:
وكيل الماليزية بروتون ساجا .. عز العرب بيقدم ضمان 5 سنوات أو 150 ألف/ كم أيهما أقرب،اما بالنسبة للاسعار فكانت زادت سعر بروتون ساجا في السوق المصري، بالرغم ان الموديل المتاح منها هوا موديل 2022 والوكيل مطرحش الموديل الجديد بتاع السنة 2023.
والزيادة في الاسعار وصلت لـ30 ألف جنيه على الفئتين المتوفرتين من الوكيل وسعر الفئة الاولي وصل لـ 400 ألف جنية و الفئة التانية لسعر 420 الف جنية.
الخلاصة مميزات السيارة، العربية بتقدم أفضل تجربة قيادة في فئتها و بتقدم ثبات كويس علي السرعات العالية
والعربية بتتصنع وتجمع في ماليزيا على عكس كتير من المنافسين الي بيكون تقفيلهم المحلي.
و العربية بتقدملك مجموعة من عوامل الأمان الكويسة وسعرها منافس بالنسبة لعربيات تانية في نفس الفئة، دي كانت مراجعة بروتون ساجا ومتنسوش تتابعوا منصات الاموال عشان يوصلكوا كل جديد.
