فولة واتقسمت نصين!..نجوم الفن ستتفاجئ بان لهم توأم

عندما نتحدث عن التوائم للنجوم، دائما نتذكر نجوم الرياضة حسام وإبراهيم حسن، حيث أنه قد يكون التوأم متماثل نفس الشكل بالضبط كما يقولون “فولة وإتقسمت نصين بالكربون يا حبيبى بالكربون”، وممنن يكونوا توأم لكن الشكل مختلف لكن كل التشابه الروحى لهم أحيانا بكون واحد في الهوايات في المشاعر في حب أكله معينة وهكذا ، فهل تعلم أن لنجوم الفن توائم؟ و صورة طبق الأصل منهم،  فمن هم هؤلاء النجوم؟ هذا ما نتعرف عليه من خلال التقرير التالي:

الحقيقة إن كتير من النجوم اللى لهم أخوات في الوسط الفني سواء توائم لهم أو لا ، مش بيحبوا يتكلموا عن ده أو يظهروهم في حفلاتهم ولقاءاتهم أوإن الجمهور يعرف أصلا
ومنهم اللى كلنا عارفين إن لهم أشقاء توائم يلا بينا نتعرف أكتر عليهم ونعرف السر في إنهم يخبوا إيه؟

الفنانة شويكار لها توأم ولكن مكنتش بتحب تتكلم عنها ولا تجيب سيرتها خالص ، وحد من المقريبن لشويكار قال إنها في مرة حبستها في الأوضة علشان متنافسهاش في مسابقة كانت بداية الشهرة لشويكار ودخولها عالم الفن .
شويكار يبقى لايمكن ننسى الأستاذ فؤاد المهندس كمان كان له توأم إسمه سامى لكنه بردوا مكنش بيتكلم عنه في أي لقاءات له .

على عكس الفنان عماد حمدى كانت علاقته قوية أوى بأخوه التوأم عبد الرحمن لدرجة متعرفش تفرق بينهم نفس الطول ونفس درجة البشر والشعر،ولما مات عبد الرحمن الفنان عماد حمدى حالته الصحية والنفسية إتدهورت خالص وقالوا إن شعره طول لدرجة وصل لأكتافه،وإتوفى بعدها بمده صغيرة ، كمان كان بيجمعهم الفن وإهتم بدراسة الموسيقى في شبابه مع عماد حمدى ، ولكن بعد كده فضل ممارسة الرياضة، وفى بداية حياتهم إشتغل عبد الرحمن في الجمعية الزراعية الملكية أما الفنان عماد كان شغال باشكاتب حسابات في مستشفى أبو الريش ده طبعا بجانب شغله في التمثيل .

وكمان الفنانة نجلاء فتحى كان لها توأم إسمها منى ،وظهرت منى برة إستوديوهات التصوير السينمائى في مناسبات كتيرزى فرح بنت نجلاء فتحى ياسمين أبوالنجا ، وقالوا إن إتعرض على منى أكتر من عمل فنى ولكنها مكنتش بتحب التمثيل ورفضت كل العروض.

اللواء أحمد شوقى هو توأم الفنان فريد شوقى ، اللى كان شبه بالملى واللى جمعتهم صورة مع الفنانة هدى سلطان في حفل زفافهم ، ولإن كتير من الوسط وبرة الوسط ميعرفش عن فريد شوقى له توأم إتفاجى الكل ولولا إن فريد شوقى كان قاعد جنب هدى سلطان ماهو العريس بقى كانوا قالوا عليه هو العريس .

ولكن رانيا فريد شوقي نشرت مؤخراً صورة تجمع بين والدها وبين أخوه اللواء أحمد شوقى وأكدت إنه أخوه الأصغر ومش توأمه زى ما بيتقال .

وبردوا الفنان حسن يوسف قالوا إن له أخ توأم علشان الشبه الكبير بينهم ولكنهم هم أخوات ولكن مش توأم

أما بقى زبدة زى ما كان بيناديها الفنان قيس عبد الفتاح تعرف إن لها توأم؟ محدش يختلف عن جمال ورقة زبيدة ثروت تخيلوا بقى إن لها نسخة تانية بنفس الملامح دى ؟ أختها التوأم إسمها حكمت، وكانوا متعلقين ببعض أوى لدرجة إنها كانت بتبقى معاها في كل أوقات التصوير في الإستديوهات ، وكتير من المنتجين إقترحوا عليهم يعملوا عمل فنى مشترك كتوأمين ،ولكن حكمت كانت بترفض ،ومش في دماغها الفن وإتجوزت بدرى ومبقتش تظهر كتير مع زبيدة إلا في المناسبات الخاصة .

ومن أشهر بقى النجوم اللى لهم توأم ، صاحب الدم الخفيف والروح الحلوة ، نجم الكوميديا عمرو عبد الجليل، الفنان عمرو عبد الجليل فاجأ الجمهور في يونيو 2013 إن له توأم داعية إسمه أيمن عبد الجليل ،وده في حواره على واحدة من القنوات الدينية .

وقال عمرو ساعتها على التناقض بينه وبين توأمه أنا وأخويا هو شيخ وأنا ممثل ومش هنختلف وإن كل واحد بيحترم شغل التانى وبتشاورا كتير في كل اللى يخص حياتهم ،ولما سأله المذيع كم مرة أقام أخوك عليك الحد؟ قال أنا بعد نقاش طويل مع أخويا إكتشفت إننا كلنا كفرة بمعنى إن المؤمن بالله يكفر بكل شيء سواه بمعنى إن علشان أكون مؤمن لازم أكفر بكل شيء علشان إيمانى بربنا .

ياترى كنت تعرف إن النجوم دول لهم توأم؟ هل شايف إنهم فعلا وجوه كان لازم تظهر على الشاشة بردوا؟ ولا كفاية اخواتهم اللى ظهروا؟ شاركونا في التعليقات.