المطربة ياسمينا العلواني نجمة برنامج آرابز جوت تالنت دخلت دنيا و لبست الفستان الأبيض وعائلتها وأصحابها فرحوا بها.. وعريسها استقبلها بالبوس والأحضان وكإنه ما صدق اليوم هذا يأتي.. ودخلت فرحها على أغنية سطلانة التي أصبحت ماركة مسجلة.
لكن ليه في عز فرحتها دي أبوها مرضيش يرقص معاها.. وسر غياب النجوم.. لقطات حصرية حصلت في حفل زفاف ياسمينا العلواني هنحكيلكم تفاصيلها ونستعرضها في التالي:
ياسمينا العلواني ما صدقت عدى أسبوع على عيد ميلادها الـ25 وقالت كفاية كده بقى هدخل القفص الدهبي برجلي.. هي كانت بتجهز لفرحها ده من شهر ونص بس الجمهور اتفاجيء بالصور والفيديوهات بتاعة فرحها.. طبعًا الفرح كان مليان معازيم وصحاب والعريس رجل أعمال والكل كان فرحان بيها لكن أبوها رفض يرقص متعرفش بقى بيتكسف ولا في حاجة مزعلاه هقولكم اللي حصل طبعًا.. لكن أغنية سطلانة اللي بقت مرتبطة بالنادي الأهلي من وقت ما خد النجمة الـ11 بقت مرتبطة بمناسبات تانية كمان عادي.
ترتيبها الوسطانية
ياسمينا العلواني عافرت كتير أوي عشان توصل وتنجح في شغلها وسط جو إنتاجي في الغنا مش أد كده.. وهي بدأتها من وهي صغيرة تطلع من إسماعيلية على دار الأوبرا في القاهر كل يوم عشان عندها حاجة عاوزة تحققها ومع الوقت قدمت في برنامج آرابز جوت تالنت وكانت أول واقفة ليها قدام نجوم لجنة التحكيم أحمد حلمي ونجوى كرم وعلي جابر وناصر القصبي كانت خايفة والبرنس قالها لو خوفتي هتفشلي غنت ولهفت قلب الجمهور ومعاه لهفت الباز الدهبي وكملت لحد ما بقت نجمة البرنامج.. هي ترتيبها وسط اخواتها الوسطانية وهي بنوتة على ولد و3 بنات تانيين وأسرتها دعمتها يعني البيت كله آمن بموهبتها وصدقوا حلمها وأبوها أكتر واحد دعمها وهو اللي يعتبر سبب كبير في كل اللي هي فيه دلوقتي.
استقبال بالبوس والأحضان
الأب طبعًا الفرحة مش سايعاه وقال أخيرًا جه اليوم اللي أفرح بيه ببنتي طبعًا هو بيدعمها من صغرها ولازم هيسلمها لعريسها بس اللي شوفناه إنه سابها ترتب فرحها بنفسها واللي استقبلها هو عريسها وخرجت له وهي لابسة فستان زفتها وكان ديله طويل جدًا خدها بالبوس والأحضان وعملوا أحلى سيشن يحلم بيه أي عريس وعروسة.. وعريسها ده يبقى رجل الأعمال الشاب عبدالله يسري.. وطبعًا صحابه الشباب كانوا جنبه وفرحوا لفرحته ونشرت ياسمينا العلواني صور السيشن على صفتها في فيسبوك وقالت للجمهور مفاجأة مش كده؟
أغنية سطلانة
طبعًا أغنية سطلانة بتاعة عبدالباسط حمودة ومحمود الليثي من فيلم بعد الشر بقت مشهورة جدًا من وقت ما رقص عليها نجوم النادي الأهلي بعد ما خدوا دوري أبطال أفريقيا من فريق الوداد المغربي يوم 11 يونيو.. ودي كانت اختيار ياسمينا العلواني عشان تدخل عليها هي وعريسها زفتهم وسط المعازيم والحبايب وقعت ترقص عليها شوية وكانت بجد عروسة فرفوشة وضحكتها مالية وشها وكملت فرحها اللي اتعمل في قاعة في 6 أكتوبر وهي بترقص وتغني ومبسوطة.
فستانين وأبوها مرقصش
فستان السيشن غير فستان الفرح في القاعة وده اللي عملته ياسمينا العلواني ولبست فستانين والاتنين أحلى من بعض وهي كانت عروسة زي القمر وكلت الجو من الكل.. لكن لاحظنا في فيديو كده إن أبوها مرضيش يرقص معاها وطبعًا ممكن تقولوا مبيعرفش يرقص أو مش عاوز يعمل كده عشان الهيبة ولا حاجة.. بس اللي حصل إنه مرضيش يدخل وسط صحباتها البنات اللي كانوا بيرقصوها وفرحانين بيها عشان شكله اتكسف وهي كانت عمالة بتشده وهو مرضيش يرقص.. وي نهاية الفيديو ده بنتمنى للمطربة العروسة ياسمينا العلواني وعريسها رجل الأعمال عبدالله يسري السعادة في حياتهم.
لكن كمان الي كان لافت في الفرح أن مفيش نجوم حضروا إلا أنا قليلة جدا وده بسبب أنها ملهاش صداقات كتير في الوسط الفني.
