بعض النجوم لم يحققوا شهرة واسعة إلا بعد سنوات طويلة وهذا لا يعني أنهم كانوا غير جيدين قبل ذلك ولكن كل شخص يكون له وقت لنضجه يكون مكتوب عند الله، وظهر من هؤلالء النجوم عدد كبير في دراما رمضان سنتعرف عليهم من خلال التقرير التالي:
ساعات كدة بنتفرج على أعمال درامية أو حتى سينمائية، ونلاقي نجوم ليهم طلة وقبول وممثلين جامدين أوي، ونقول الله طب ودول مكانوش شغالين ليه، ولكن بتحصل صدفة حالة نضوج مع ورق كويس ومخرج عينه حلوة، بيبدأ يظهرلنا مناطق تانية في النجوم دول يمكن مكناش شوفناها قبل كدة.
منهم الفنان أحمد فهيم اللي أبهر جمهوره خلال موسم رمضان الحالي بدوره في مسلسل جعفر العمدة، وهو بيشتغل من 2008 يعني مش جديد علينا، ولكن لما شوفناه في دور سيد، قولنا مينفعش حد يعمل الدور غير الراجل ده، ممثل شاطر ومحترف وبيعرف بتحكم في انفعالاته وعامل دوره زي ما بيقول الكتاب، لدرجة إن الجمهور لما عرف إن في ناس تاني كانت مترشحة للدور، قال لا هو أحمد فهيم أحسن واحد كان ممكن يعمل الدور ده.
بيومي فؤاد واحد من النجوم اللي بقالهم كام سنة واكلين كل المواسم والمسلسلات والأفلام، وناقص تفتح الحنفية تلاقيه نازل منها، وهو ماشاء الله قرب يوصل لـ300 عمل فني مشارك فيهم، بيعمل أرقام قياسية الحقيقة، وهو في موسم رمضان الحالي مشارك في أكتر من عمل فني منهم رمضان كريم، و1000 حمدالله على السلامة، وطبعا الكبير أوي الموسم السابع، بيومي فؤاد بدأنا نشوفه في السينما والدراما بعد ما عمره تخطى الأربعين، ولكن بعدها بكام سنة بقى واحد من أهم النجوم.
الفنانة عارفة عبدالرسول من النجمات اللي حبيناهم على الشاشة وبتتميز ببساطتها، وخفة دمها، بقينا نشوفها في أعمال كتير وفي موسم رمضان الحالي مشاركة بمسلسل «بابا المجال»، وإحنا مبدأناش نشوفها في الدراما والسينما إلا بعد ما تخطت سن الـ50 برغم إنها كانت فنانة وبتشتغل مسرح وتعمل عروض حكي، إلا إننا معرفنهاش إلا لما كبرت ونضجت.
الفنان سيد رجب من النجوم اللي كانوا بيشتغلوا مسرح ويشتغلوا حاجات كتير، وواخد جوايز كتير، ولكن على مستوى السينما والدراما مشفناهوش إلا باردو لما كان كبر وتحديدا بقى من فيلم إبراهيم الأبيض سنة 2009، ومن ساعتها انطلق سيد رجب عشان نشوف واحد من أهم نجوم السينما والدراما، وفعلا ده اللي تقدر تقول عليه غول تمثيل وانت مستريح، وبيشارك في موسم رمضان الحالي بمسلسلات الأجهر ورمضان كريم.
محمد محمود من النجوم التقال أوي، ودمه خفيف ووشه ليه قبول كبير على الشاشة، ولكن معرفناهوش وابتدينا ناخد بالنا إن في نجم كبير ولكن لسة مخدش حقه إلا لما شنفاه في فلم أمير البحار مع الفنان محمد هنيدي في 2009، ومن ساعتها بقينا نشوفه في أعمال كتير، والفتر الأخيرة بيعيش حالة نجاح وتألق كبير بعد مشاركته في مسلسل بالطو واللي كسر الدنيا، وفي موسم رمضان مشارك بـ3 أعمال مسلسل الكبير أوي الجزء السابع، ومسلسل الهرشة السابعة ومسلسل 1000 حمد لله على السلامة.
محمد رضوان بقى، لقينا نفسنا مرة واحدة قدام كوميديان جامد جدا، في مسلسل موضوع عائلي، وبالرغم من إنه شغال من بدري وليه أعمال كتير، ولكن زي ما قلنا في لحظة كدة بتتحد الظروف كلها عشان تقولك شكرا على تعبك، اتفضل خد حقك، وبقينا نشوفه في أعمال فنية كتير، وبياشرك في موسم رمضان الحالي من خلال مسلسل بابا المجال.
