ألية جديدة تظهر كل يوم للنصب،وتندرج تحت بند النصب الألكترونى،النصب الإلكترونى أصبح أسهل ومغرى أكثر لكثير من جمهور السوشيال ميديا، وخاصة بعد الاغراءات بالعائد اليومي.
ما تيجوا نعرف إيه حكاية التطبيق الجديد اللى منتشر الفترة الأخيرة ده،وإزاى من خلاله الناس بتتعرض للنصب،مش هتصدق الناس إقتنعوا إزاى بمميزاته،تفاصيل كتير هتعرفها فى الفيديو ده تابعونا..
إرجع معايا لمدة سنة كده تقريبا فى نفس التوقيت بالظبط،ظهر تطبيق إسمه الرمال البيضاء ،وإتقال إنه منصة لربح الأموال عبر الإنترنت، ولكن في الحقيقة هو خدعة جديدة للنصب على المستخدمين .
وساعتها التقارير كشفت أن تطبيق الرمال البيضاء ده هو برنامج بيتم الترويج له ،وتحصل على الفلوس بسهولة، كل اللى عليك تنفذ بعض المهام البسيطة زى مشاهدة الفيديو أو الاشتراك في القنوات أو الإعجاب بالمنشورات أو متابعة الأشخاص والصفحات على يوتيوب وفيسبوك.
المهم يعنى إن خلال شهرين بس ضم تطبيق “الرمال البيضاء”،حوالى 6 مليون مشترك، وتراوحت قيمة الأموال اللى جمعها مديري التطبيق من اشتراكات المستخدمين ما بين 3 و5 مليار جنيه ، ومع بداية عام 2022، توقف سحب الأرباح في الموقع، وقام المشرفين على التطبيق بالنصب على المستخدمين وتحويل الملايين دى اللى سرقوها إلى عملات رقمية مشفرة وتهريبها للخارج.
المفروض بقى الناس تاخد عبرة من التطبيق ده ولو ظهر مليون تطبيق تانى خلاص لا يمكن ينضموا ليه،لكن اللى حصل غير كده أمال مين يضحك ويتنصب عليه؟
الحقيقة إن التطبيق الجديد ده مفرقش أوى عن تطبيق الرمال البيضاء ،وطريقة عمله هى نفس طريقة عمل تطبيق الرمال البيضاء وبيوفر بردوا مجموعة من الباقات المختلفة، يمكن لمستخدمي التطبيق ربح الأموال عبر الإنترنت، تبدأ بمنح المستخدم الجديد للنسخة المجانية 10 جنيهات، و7 باقات مدفوعة أو فى أى بى بتبدأ من 300 جنيه ولحد 30 ألف جنيه.
وإنت واللى معاك بقى ،كل ما حجم الباقة بيزيد،وكل ما المهام اللى تتطلب منك تزيد كل ما الربح يزيد طبعا .
ألية عمل التطبيق الجديد مش مختلفة خالص عن تطبيق الرمال البيضاء ،لكن الربح على المنصة الجديدة بيكون أسهل ،ومفيش تنفيذ كتير للمهام،كل اللى بيطلبه منك هو إنك تحط فلوس بس والربح هيكون يومى ،مفيش أسهل من كده فلوس.
وبمجرد التسجيل على التطبيق أو المنصة، هتاخد 20 جنيه مع ربح يومى حوالى 5 جنيه من غير ما تحط أى فلوس ،لكن فى حالة الإيداع والإشتراك فى الباقات اللى بتوفرها المنصة هتاخد طبعا فلوس أكتر وهكذا.
الباقات دى بتبدأ من إيداع 100 جنيه لحد 500 جنيه، تمنح باقة الـ 100 جنيه أرباح 25 جنيه في اليوم لمدة 60 يوم بإجمالي أرباح (1500 جنيه)، وتمنح باقة 300 جنيه ربح 66.5 في اليوم لمدة 60 يوما بإجمالي أرباح (3990 جنيه).
أما باقة 500 جنيه، ربح 110 جنيه في اليوم لمدة 60 يوم بإجمالي أرباح (6600 جنيه)
طبعا من وقت إنتشار التطبيق ده وأى تطبيق تانى كتير من الخبراء بيحذروا من خطورة إستخدام التطبيقات دى والمنصات اللى بتنصب وتخدع الناس بالربح الإلكترونى عن طريق إنها بتغريهم بالربح السريع فى البداية وتحويل الأرباح بإنتظام علشان بس يجذبوا الناس ويجيبوا رجليهم، وبعد كده يقفلوا التطبيق وكأن مفيش حاجة حصلت لا فى إثبات إن إتاخد منك فلوس ولا تقدر تطالب بأى فلوس.
خلى بالك اللى بيجى سهل بيروح سهل،وإن متعبتش فى القرش وكسبته من عرق جبينك وحسيت بقيمته لما يروح متلومش غير نفسك،الغريب إن لسه فى ناس بتصدق فى الأرباح الوهمية دى ،لسه فى ناس بتجرى على النصاب وتمسك فيه وكأنه هيجبلهم لبن العصفور.
ورغم كل التحذيرات والوقائع اللى بتحصل إلا إن بردوا لسه هوس الفلوس إنها تيجى من الهوا مسيطر على عقول البعض ..إنتوا رأيكوا إيه فى التطبيقات دى وهل حد إتعرض من خلالها لأى نصب شاركونا برأيكوا فى التعليقات.
