منوعات

شباب في بني سويف يخدعون تجار آثار بمقبرة عمرها أسبوع فقط!!

يوم عن يوم يبرهن المصريين أن أصلهم فراعنه فعلا، ذكاء خارق وتفكير جبار، والذى فعلوه هذه المرة المصريين في بني سويف الناس يتتحاكى به لفترة، تخيلوا مجموعة من المواطنين عملوا مقبرة مزيفة فرعونية كاملة في بنى سويف، وضعوا فيها سبائك ذهب وتماثيل ولكي يخدعوا المواطنين.

إيه قصة المقبرة الفرعونية اللى قلبت الدنيا في بنى سويف؟ .. وازاى مجموعه من النصابين قدروا يصمموا المقبرة دى ويحطوا فيها دهب وتماثيل؟ وإزاى خدعوا تجار الآثار؟.. كل ده وأكتر هنعرفه مع بعض في التقرير التالي:

خلال الساعات اللى فاتت كشفت السلطات الأمنية في مصر عن وجود مقبرة طبق الأصل تشبه المقابر الفرعونية زمان، مليانه دهب وتماثيل، لدرجة أن الدكتور مصطفى وزيرى الأمين العام للمجلس الأعلى للاثار بنفسه راح المقبرة عشان يتأكد انها فعلا تقليد مش أصلية.

بتوضح التحقيقات أن المقبرة مجهزة على أكمل وجه، جدرانها مرسوم عليها نقوش فرعونية تشبة الأصلية تماما، وبداخلها تابوت من الجبس وتماثيل تشوفها تقول دهب، بس هي مش دهب، مرشوشه بس مايه دهب ومصنوعه من الجبس، وكل ده ليه، للنصب على الطامعين في الثراء السريع.

وبالفعل التحقيقات بتقول أن النصابين اللى عملوا المقبرة قدرا ينجحوا فعلا في النصب على عدد من التجار وباعوا ليهم كام تمثال، والشرطة دلوقتى بتدور عليهم وعلى كل اللى اتعامل في المقبرة دى، بدايه من عمال الحفر لحد الرسام اللى أبدع في رسمه ورسم الرسومات الفرعونية على جدران المقبرة وهو كان يعلم تماما المقبرة هاتستخدم في أيه.

ووفقا لكلام مدير آثار بنى سويف، فا الأجهزة الأمنية توصلت عبر تحرياتها إلى أن المتهمين الهاربين اللى عملوا المقبرة، فضلوا شغالين عليها لمدة سنة كاملة بغرض النصب على الطامعين في تجارة الآثار المجرمة قانونا، متخيلين سنة كاملة شغالين عليها، ياصبرهم والله، بس نتيجته صبرهم جابت نتيجة وأكتر من مرة قدروا يبيعوا تماثيل من المقبرة دى.

طيب إيه اللى الشرطة والمجلس الأعلى للأثار عملوه في المقبرة ؟
مدير آثار بنى سويف قال أن الأجهزة الأمنية دمرت المقبرة عن بكره أبيها، وقعوا سقفها على الأرض حرفيا وكسروا كل اللى كان فيها، والكلام ده علشان ما يتم استغلال المقبرة مرة تانيه في النصب على المواطنين، خصوصا أن المقبرة مقلدة بحرفيه وتشبه المقابر الأصلية في تجهيزاتها.

طيب حد هيجى في باله ما كانوا سابوها وعملوها حتى مزار سياحى أو أي حاجة من الحاجات دى، وتعريف الناس بردوا أنها فلصوا مش أصلية.

هنا كان الرد، أن البلد مليانه اثار أصلية فعلا ممكن الناس تروح تشوفها ومافيش أي داعى لوجود المقبرة خصوصا أنها مفيهاش أي حاجة أصليه وليها قيمة، ده كمان التهمة اللى هتوجه للى عملوا المقبرة هي النصب والاحتيال وليس الإتجار في الآثار لأنه مافيش آثار أصلا في المقبرة.

وفي النهاية ناشد الدكتور مصطفى وزيرى الأمين العام للمجلس الأعلى للآثار، كل المواطنين عدم الانسياق وراء قصص مقابر الآثار دى ولتجار الآثار المصرية، وأن يساعدوا السلطات المصرية ورجال الآثار فى مواجهة تجارة الآثار الغير شرعية تماما .

لحد هنا ونكون وصلنا لنهاية الفيديو، أنتم أيه رأيكم فى اللى عمله الجماعة النصابين دول، رأيكم في شكل المقبرة، تخيل فعلا على اللى بيشوفها ولا لا؟.. اكتبوا رأيكم في التعليقات.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى