كام مرة حصلت على اجازة ، وظل زملائك في العمل يتصلون بك ويسئلونك عن بعض الملفات وغيره، مما يؤثر على استماعك بالإجازة، ولكن أخير شركة وضعت حدا لهذا الإزعاج وقررت فرض غرامة خيالية على من يقوم بهذا التصرف تابعونا من خلال هذا التقرير وستعرفون التفاصيل:
“دريم 11” شركة بتدير منصة رياضية خيالية اسمها الفانتازي، بتسمح للمستخدمين بالمشاركة في لعب الكريكيت والهوكي وكرة القدم والكابادي وكرة اليد وكرة السلة والكرة الطائرة والرجبي وكرة القدم داخل الصالات وكرة القدم الأمريكية والبيسبول. الشركة دي بتدي اجازة سنوية للموظفين اسبوع على الاقل.
والجديد بقى ان الشركة دي فرضت غرامة تقدر بـ1200 دولار على أي موظف عندها يتصل بزميله في وقت إجازته, يعني 35 ألف و400 جنيه لو حسبنا الدولار على 29.5 جنيه بس! وكل ده ليه؟ عشان يحافظ على حالة الاسترخاء اللي يستحقها الموظف أثناء قضاء إجازته.
ونزلت الشركة بيان مخصوص قالت فيه “الوقت المخصص للإجازة يسمح لموظفي الشرطة بالاسترخاء وإعادة شحن طاقتهم والعودة إلى العمل مستعدين لتقديم أفضل ما لديهم”.
الشركة دي هندية واتاسست في 2008 وعندها 15 مليون مشترك، بس للحقيقة مش دريم 11 بس اللي بتدور علي رفاهية موظفيها.
عندك أمريكا وكندا مثلا في ابريل 2022 أعلنوا عن تجربة عمل جديدة استمرت 6 شهور وانتهت في سبتمبر. التجربة دي كان هدفها قياس انتاج الموظفين لو اشتغلوا 4 أيام بس في الأسبوع وشارك فيها 38 شركة من الدولتين.
ومن قبلها شركة “فيرسا” للتسويق الرقمي في أستراليا، كانت قللت عدد ايام العمل الي 4 أيام في 2018، وصاحبة الشركة قالت إن بعد القرار ده زادت العائدات السنوية بنسبة 46٪، وتضاعفت الأرباح 3 مرات تقريبا.
“مايكروسوفت” نفسها لما طبقت التجربة على فروعها باليابان اكتشفت إن معدل الإنتاجية زاد 40%. وكمان في مزايا إضافية زي تخفيض حجم الورق المطبوع بقيمة 60٪، وانخفاض نفقات الكهرباء بقيمة 23 ٪.
وعلي فكرة مش الاجانب بس اللي بينفذوا الفكرة، الإمارات هي اول دولة عربية تطبق فكرة العمل لمدة 4 ايام بس في الأسبوع، وتحديدا في إمارة الشارقة.
التنفيذ بدأ في يناير 2022 وبعد 8 شهور، طلعت سلطات الشارقة تقرير لتقييم التجربة، قالت فيه انها لاحظت ارتفاع مؤشرات جودة العمل والكفاءة والانتاجية وسرعة الإنجاز ومستويات رضا الموظفين والمتعاملين.
حتى الأداء المالي للحكومة اتحسن، ومش بس كده، انخفضت المشاكل المرورية مقارنة مع الربع الأول لعام 2021 بنسبة تصل إلى 40٪.انت بقى قولنا بتشتغل كام يوم؟ وهل نظام ال4 أيام عمل ينفع معانا في مصر؟ ولا برضه الإنتاج مش هيزيد؟
