مسلسل جعفر العمدة تسبب في حالة من الجدل في الشارع وبين الجمهور على السوشيال ميديا، والآن نستطيع أن نقول أنه المسلسل الأكتر جماهيرية خلال شهر رمضان، بدون منازع .
يمكن في أعمال تاني عاملة صيت كويس باردو ولكن جعفر العمدة هو المسلسل اللي عامل حالة جامدة والناس متابعاه باهتمام شديد بكل تفاصيله..
مع تطور أحداث مسلسل جعفر العمدة الناس بقت بتتوقع وبتسأل ايه اللي هيحصل في الحلقات الجاية من قبل ما تنزل لدرجة إننا بقينا نشوف ناس منزلة تسريبات، بما فيهم أبطال العمل نفسه، اللي هو محمد سامي مش عارف يجيبها منين ولا منين، العمل حقق تفاعل جماهيري كبير للدرجة اللي بقى صعب معاها السيطرة على تفاصيل الأحداث الجاية
خلال الحلقات اللي فاتت شوفنا شوقي اللي بيلعب دوره الفنان منذر ريحانة خرج من السجن، ومن هنا الأحداث خدت شكل تاني خالص، لأن في الوقت نفسه جعفر العمدة كان مسافر مع عايدة مراته الرابعة واللي بتلعب دورها الفنانة زينة، وكانوا بيقضوا كام يوم في لبنان.
شوقي بمجرد خروجه من السجن الأحداث ولعت، وبدأت ينفذ خطة الانتقام بتاعته من عيلة العمدة، وأول حاجة عملها إننا اتفاجئنا بإنه اتجوز وداد اللي كانت مرات سيد أخو جعفر، واللي هو في الأول مكنش يعرف إنها خلعته وكانت عايشة معاه آخر كام شهر من غير ما يكون على ذمتها أصلا.
سيد أخو جعفر لما شاف كدة اتجنن وعشان هو دماغه خفيفة شوية، مقدرش يمسك نفسه ومسك سلاح ونزل يجري على بيت شوقي فتح الله عشان ينتقم منه، فشوقي كان مرتب وعامل حسابه، ومسك سيد ضربه ومرمط بيه الشارع، وجاب كمان الرجالة اللي تبعهم واللي كانوا مستخبيين فوق سطوح البيت ونزل ضرب سيد ونعيم وبهدلهم وفرج على عيلة جعفر العمدة المنطقة كلها.
بمجرد ما جعفر عرف الكلام ده قرر إنه ينزل مصر، عشان يتفاجئ إنه بيتقبض عليه في المطار، بتهمة إنه معاه مواد ممنوعة في شنطة السفر، فبيتحبس جعفر، وشوقي بيكمل في استفزازه لعيلة العمدة.
لكن السؤال اللي شاغل ناس كتير، كان جزء من حوار بين شوقي وبين وداد، لما بتقوله أنت بتعرف منين كل التفاصيل دي عن بيت جعفر العمدة، فقالها أنا ليا عيون جوة بيت جعفر.. وهنا الناس بتسأل يا ترى مين الخاين اللي جوة بيت جعفر؟
الاحتمالات للإجابة على السؤال ده كتير، ومنها دلال ودي أخت شوقي ومرات جعفر، واحتمال وراد إنها تكون بتوصلهم الكلام وفي تواصل ما بينهم، ويكون كل الحركات اللي بتحصل في العلن دي مجرد شو.
في احتمال كمان إن تكون ثريا مرات جعفر ضعفت وراحت اترمتلهم عشان يقولوها على مكان ابنها من جعفر المخطوف من 19 سنة، وهما ساوموها بإنها تنقلهم المعلومات مقابل إنه يقولها على مكان ابنهم لما يحقق انتقامه.
والاحتمال الأقوى تكون عايدة مرات جعفر الرابعة واللي علاقته بيه بدأت لما كانت رايحة عشان تاخد منه 40 مليون جنيه عشان تطلع أبوها من السجن، وممكن يكون شوقي أصلا كان يعرف أبوها في السجن وهو اللي زاققها على جعفر وكان اتفاق ما بينهم من الأول، إنها تنقله المعلومات، وتاخد الفلوس دي من جعفر عشان تخرج أبوها وهو اللي هيجميها.
احتمال إن نرجس تكون ورا الموضوع ده مستبعد لأنها مكنش ليها أي ارتباط بعيله فتح الله من بداية المسلسل، وكمان احتمال نعيم مستبعد لإن اللي حصل من أخته لما اتجوزت شوقي في إهانة كبيرة ليه ولأبوه كمان ولعيلته، وكمان هو الدراع اليمين لجعفر العمدة، واللي صعب يخونه.
يا ترى إنتم شايفين مين عين شوقي في بيت جعفر العمدة؟
