يبدو أن المستشار مرتضى منصور رئيس نادى الزمالك سيعتزل من مكانه قريب، الناس تردد هذا الكلام على السوشيال ميديا، بسبب ما فعله مع لجنة الانضباط باتحاد الكرة المصرى، والذي أصدر بيان من قليل أعلن خلاله أن سيوقف التعامل مع المستشار هذه الفترة، وسيصعد الموضوع لأخطر من ذلك.
فهل فعلا يقدر اتحاد الكرة أنه يعزل المستشار مرتضى منصور من منصبه في الزمالك؟.. طيب لو حصل المستشار هيعمل إيه؟
الرجالة في اتحاد الكرة المصرى أخدوا حباية الشجاعة، ومن شوية طلعوا بيان قالوا فيه أنهم هيوقفوا التعامل من المستشار مرتضى منصور، رئيس نادى الزمالك، بعد اللى عمله مع لجنة الانضباط وتخويفه ليهم الفترة اللى فاتت، واللى بسببه قدموا طلب للاستقالة، بس ما اتوافقش عليها.
ده كمان قالو إن هيبقى فيه تصعيد في الأمر وأنه مش بس هيكتفوا بوقف التعامل معاه، وبعد كلامهم ده، ناس كتير على السوشيال ميديا قالت أنه ده ممكن يكون بداية لإجراءات تتم لعزل المستشار مرتضى منصور من منصبه كرئيس لنادى الزمالك.
فهل حد فعلا يقدر يعزل المستشار مرتضى منصور من منصبه؟الحقيقة أه.. اللى يقدر على القرار ده اللجنة الأولمبية المنظمة لكرة القدم في العالم كله، واللى فيه ممثلين ليها في مصر، واللى ممكن عن طريق تقديم عدد كبير من الشكاوى في المستشار مرتضى منصور، أنها تحقق في الأمر، ولو صح هتصدر قرار بعزله فورا.
وده حصل فعلا من سنتين، أيام ماكان عمرو الجناينى، هو رئيس اللجنة الخماسية اللى بتدير كرة القدم في مصر، ووقتها طلع وأعلن عن قرار من اللجنة الأولمبية المصرية يفيد بعزل مرتضى منصور من منصبه بناء على شكاوى من اتحاد الكرة المصرى وعدد كبير من الأندية المصرية وقتها.
ووصل الأمر أن يكون قرار الإيقاف لمدة 4 سنوات ومنعه من المشاركة في أي نشاط رياضى خلال فترة الإيقاف.
هو أه وقتها القرار متنفذش لأسباب مانعرفش كواليسها بالظبط، بس ده يلمح أن ممكن يكون ليه الحق لاتحاد الكرة الحالي أنه يشتكى المستشار مرتضى منصور ويعبر عن غضبه ضده، وعليه تقدر اللجنة الأولمبية تحقق في الأمر ولو صح تطلع قرار بعزل مرتضى منصور من الزمالك، وممكن تدفعه غرامة مالية كبيرة كمان.
وعلى فكرة الدستور المصرى كمان بيدعم قرارات اللجنة الأولمبية، وفقا لنص المادة 84 من الدستور المصري، وكمان نصوص قانون الرياضة رقم 71 لسنة 2017، واللى بينص على تطبيق وزارة الشباب والرياضة وتنفيذ القانون والميثاق الأولمبي ولائحة اللجنة الأولمبية بتنفيذ العقوبات الصادرة بعد التحقيقات التي تتخذ.
تفتكروا بقى بعد القرارات دى ممكن تطلع قرارات بعزل المستشار مرتضى منصور من منصبه، ولا هتبقى حبايه شجاعه بس لاتحاد الكرة وبعدين يزول مفعولها، ده اللى هنعرفه الفتره اللى جايه مع بعض.
