منوعات

جواز وفرصة سفر!..قصة جروبات مطلقات الكويت مع الشباب المصري

منذ فترة ونحن نرى بوستات غريبة على فيس بوك والسوشيال ميديا، بيعرض فيها شباب مصري نفسه للزواج من سيدات كويتيات، ليس هذا فقط بل ان الحال وصل إلى وجود جروب على فيسبوك اسمه مطلقات الكويت والذي يحاول من خلاله الشباب المصري التواصل مع سيدات كويتيات.فما الحكاية؟ تابعونا لمعرفة التفاصيل

من وقت انهيار سعر الجنيه وزيادة الأسعار خاصة مع ارتفاع أسعار العملات الأجنبية خاصة الدينار الكويتي اللي عدى الـ100 جنيه وبدأت تنتشر جروبات على السوشيال ميديا وبالتحديد على فيسبوك غريبة وبينضم لها الشباب المصري بطريقة كبيرة وأصبح فيها آلاف كمان.

الجروبات دي اللي كان باسم واحد وهو مطلقات الكويت.. كل الشباب المصري على الجروبات دي بينشروا بوستات عن عروض جواز من سيدات في الخليج وبالتحديد في الكويت.

طيب الجروبات دي بدأت إزاي؟
بدأت مع انتشار بوستات على السوشيال بيقال إنها من سيدات كويتيات عارضين الزواج من مصريين.. البوستات دي اللي انتشرت بشكل كبير بين الشباب وتفاعل معها وبعد كده بدأ يكون في جروبات والكل بيعرض فيها الجواز.. لكن هل ده حقيقي؟

الجروبات دي انتشرت بشكل كبير وأصبح فيها آلاف من الشباب المصري.. مش بس كده ده كمان في بعض الشباب بتحكي تجربتها عن الجواز من البنات في الخليج وقد إيه الموضوع حلو ومختلف عن مصر بشكل كبير وإزاي الستات في الخليج بتدعم شركاء حياتهم في كل حاجة.. والكل بيسأل هل ده حقيقي وممكن يحصل؟

الحقيقة أكيد لاء.. وأغلب البوستات وعروض الجواز من السيدات في الكويت دي مش حقيقية.. والشباب اللي على الجروبات دي عارف كده.. لكن الشباب المصري أخد الموضوع بهزار واتحول الموضوع في أغلب البوستات بعد كده لهزاء.. خاصة أن الناس بتحب تهزر وتضحك في محاولة منهم للهروب من الظروف المعيشية الصعبة اللى بنمر بيها، يعني يبقى طالع عينه طول اليوم عشان يجيب فلوس يشتري بيها أى حاجه ياكلها، يلاقي الدنيا غاليه عليه، فهو بيفش زهقه وغله وأنه يكتب بوستات زي دي، على سبيل الهزار والدعابة.

طيب حد هيسأل اشمعنى بقى الناس بتكتب سيدات الكويت بس؟
أجاوبه وأقوله لا فيه سيدات من الكويت والسعودية وأي بلد تخطر على بالك دخلها حلو، ومعروف أن أهلها مبسوطين ماديا.

بس إحنا بنحب نجيب سيرة الكويت في الأغلب عشان الدينار الواحد دلوقتي عامل تقريبا ١٠٠ جنيه مصري، متخيلين الرقم.

فالجماعة بقى اللى بيحبوا يهزروا على فيس بوك ويكتبوا بوستات زي دى، بيبقوا قاصدين الدولة اللى فيها فلوس حلوه، يعني لو واحد اتجوز كويتية أكيد هاتنغنغه فلوس، ماهو الدينار الواحد من عندها بى ١٠٠ جنيه مصرى.

والأهم من كده بقى أنها ممكن تاخده معاها الكويت وتكون فرصة سفر محترمة قووى، وكمان توفر له شغلانة هناك، ده أن حصل يعني، والشغلانة دي تكون شغلانة السعد عليه، فلوس وعز وكل حاجة.

وفيه شباب مصري بالفعل بيصدق الكلام ده ويكتب في جروبات تعارف أنه عارض نفسه للجواز من ستات تحمل الجنسية الكويتية.

وللعلم بقى فيه سيدات كويتيات بتعجب فعلا بشباب ورجال مصريين وبتطلب منهم الجواز بعد مابتشوف منهم الجدعنه والأصل المصرى الجدع اللى يخاف عليها ويصونها، والحمد لله عندنا شباب فعلا كتير كده لكن بالتأكيد الموضوع مش بيكون من خلال جروبات على السوشيال ميديا.

فى النهايه إحنا حابين ناكد ليكم بقى أن أغلب البوستات اللى على فيس بوك والسوشيال ميديا عموما اللى بالشكل ده بيكون غرضها الهزار والضحك والتهريج فقط لا غير، ما هو بالعقل كده مفيش إعلان هيبقي بالشكل ده ياجماعة.

ماعلينا إحنا بنوضح الحقيقة، ومش عايزين الناس تصدق كل اللى بيتقال كده عشوائي ومنتشر على السوشيال ميديا، أغلب الكلام ده دلوقتي بغرض الهزار والضحك فقط، خدوا بالكم ومش أي حاجة تصدقوها.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى