كل النجوم يحبوا يأمنوا نفسهم ويضمنوا مستقبلهم ويعملوا مشاريع خاصة بعيد عن الغناء والتمثيل ، ومعظمهم فتح مطاعم وكافيهات وجيم وكان دائما عمرو دياب بعيدا عن هذا التفكيرويركز في فنه فقط.
لكن فجأة قرر يتجه للتفكير ده ودخل بقلب جامد في مشروع ضخم جدا ملوش علاقة خالص بشغله وفنه.
عمل ايه بقى عمورة ؟الراجل شغل دماغه وقرر يستثمر فلوسه في حاجة نضيفة وتعيش وتجيب فلوس، وفتح امبارح فندقه اللي سماه ” لوكاندا” في الساحل الشمالي ، بس مش اي فندق ، ده حاجة فخمة جدا وعلى مستوى عالي وهينافس اكبر واهم الفنادق في مصر.
عمرو بقى ثرر يشارك رجل الاعمال الاماراتي محمد العبار واتعاونوا مع شركة اعمار الشهيرة ، وقرروا يعملوا سلسلة فنادق جديدة ، وبدأوها بفندق لوكاندا في الساحل الشمالي، ولسة هيكملوا باقي الفروع في مصر وكمان في دبي ، ، مش بقولك شغل عالي اوي.
الافتتاح امبارح كان ضخم جدا وحضره رجال اعمال كتير ونجوم وناس من الطبقة العالية دي اللي بنشوفهم في الصور والمجلات ، وطبعا من اول الحضور كان احمد ابو هشيمة لانه صاحب عمرو دياب وكان جاي يشاركه فرحته باول مشروع يعمله بعيد عن الفن.
وظهر ابو هشيمة مع عمرو دياب في صور كتير وهما واقفين بيشاوروا على بعض ، هما متعودين يتشاركوا كل اللحظات المهمة الحلوة دي سوا وعلاقتهم قوية من كذا سنة ومازالت.
وبعيد بقى عن الفندق اللي فتحه عمرو دياب واتجاهه لمجال ادارة الاعمال ، الناس كلها سابت الفندق وركزت في الساعة اللي كان لابساه الهضبة امبارح وشوفناها في الصور.
ولاننا بنركز اوي في التفاصيل، فاحب اقولك ان عمرو دياب كان لابس ساعة تمنها حوالي 10 مليون جنيه .. متخيل الرقم ؟
الساعة من ماركة باتيك فيليب ، والاسورة بتاعتها من الذهب الوردي عيار 18 ، ومرصعة بأكتر من 30 حجر كريم ، والموديل ده من الساعة تحديدا سعره 350 الف دولار يعني بالمصري 10 مليون و815 الف جنيه .. اه زي ماسمعت متتصدمش
من حق الهضبة برضه يدلع ويلبس اغلى ماركات الدنيا ، من غير ما يستعرض ولا يتكلم عن لبسه وعربياته وساعاته ، هو راجل شغال في صمت وكل حاجة بيعملها بتتكلم عن نفسها
كمان من اللقطات اللي لفتت نظر الناس امبارح في افتتاح فندق عمرو دياب الجديد، اللوك اللي ظهر بيه الهضبة ، واتفاجئنا انه لابس قميص ابيض مخرم غريب كدا وهو من براند All Saints اللي بيحبها عمرو دياب وبيشتري معظم لبسه منها ، والقميص ده بقى رخيص خالص سعره 150 دولار بس يعني بتاع 4 الاف ونص كدا ,, الحلو يلبس الحلو برضه
طبعا بعد كل الهيصة اللي حصلت امبارح وافتتاح اول فندق لعمرو دياب وبكدا هيبكون مشغول جدا الفترة الجاية مابين متابعة الفندق الجديد ومابين سلسلة الفنادي اللي لسة هيعملها في مصر ودبي ، فهل بقى كل ده هيخليه يبطل غنا مثلا ويركز في مشاريعه بس ؟ ولا هيبقى عنده فريق يدير المشروع ويفضل هو مكمل في روقانه واغانيه وحفلاته ؟
محدش عارف عمرو ناوي على ايه الفترة الجاية لكن اكيد مش هيعتزل يعني ، هو بس طبيعة شخصية عمرو دياب بتحب التغيير وده باين عليه جدا خلال الكام سنة الاخيرة ، سواء في لبسه او شكله ولا اغانيع ختى وعلاقاته العاطفية كمان
وعشان هو مبيبحش الروتين ، جه الوقت بقى انه يدخل مجال ادارة الاعمال ويبقى عنده بيزنس كبير ومهم زي ده ، خاصة وانه سنه مش صغير، يعني لو حب فجأة يبطل غنا هيبطل ويبقى عنده مشاريعه اللي بتدخله فلوس برضه
وده كان ذكاء من عمرو دياب انه اختار الوقت المناسب عشان يعمل مشروع ضخم ، زي ماقضى حياته كلها بيغني ومركز في الغنا بس، دلوقتي هيتجه اتجاه تاني خالص مناسب لتغييرات الحياة اللي مبقتش مضمونة لكل الطبقات ، عشان كدا الهضبة حب يروق دماغه ويشوفله مشروع حلو كدا يجيب ارباح كتير عشان يوم مايقرر يعتزل يبقى في امان.
