تخيل أن فنانة شهيرة ترفض دور يعرض عليها ضمن مسلسلات رمضان لمجرد ان مساحة الدور صغيرة، وفي الأخيرة تتفاجئ بفنانة غيرها تتقن الدور وتتصدر التريند وتصبح حديث السوشيال ميديا.
المثل بيقولك دايما غلطة الشاطر بألف.. والممثل الشاطر لازم يبقى عارف ايه الدور اللي هيغير مجرى حياته.. وايه الدور اللي مش هيستفيد منه بحاجة.. هي لا عمرها بتتحسب بعدد المشاهد.. ولا باسمك مكتوب رقم كام ع الأفيش.. المهم الموهبة
وده اللي حصل السنة دي مع الفنانة درة.. موسم رمضاني لا تحسد عليه..رفضت دور مهم في مسلسل جعفر العمدة.
وقالتلك بعد ما كنت بطلة قدام محمد رمضان في نسر الصعيد.. أبقى واحدة من ضمن جوازاته السنة دي.. لا مينفعش
وراحت وافقت إنها تكون بطلة قدام عمرو سعد في مسلسل الأجهر.. اللي رغم نجاحه إلا إنه دورها محدش شايفه أصلا، يعني الناس في رمضان بتبقى ما بين الانتقاد والإشادة.. درة محدش مركز معاها بصراحة.
طب ايه الدور اللي رفضته درة في جعفر العمدة؟.. تخيلوا كده والنبي؟.. رفضت تقدم دور دلال.. اللي غير مسار حياة ومشوار إيمان العاصي الفني.. ورجعها تاني نجمة.. رغم إنها كانت الفترة اللي فاتت مختفية خالص ومحدش حاسس بيها.
من مميزات مسلسل جعفر العمدة إنه مقسم الحلقات على أبطاله كلهم.. يعني كل حلقة أو اتنين هتلاقي شخصية بتدور حواليها الأحداث.. زي ما حصل مع وداد.. ومع كارم فتح الله.. ومع نرجس وثريا.. والمعلمة الكبيرة صفصف وغيرهم.
والدور بقى اليومين دول على دلال.. اللي طلعت السبب في خطف ابن جعفر العمدة.. يعني حب حياته هي اللي ضربته في ضهره.. وسابته طول 19 سنة متعذب بيدور على ابنه يمين وشمال.
دلال هتطلع على المسرح الحلقات الجاية من مسلسل جعفر العمدة.. تخيلوا كده لو كانت درة بقى اللي مكان إيمان العاصي؟.. والحقيقة كان اختيار ذكي من المخرج محمد سامي.. إنه يجيب إيمان ينجمها.. وهي أكتر واحدة لايقة على الشخصية.. حلوة وجميلة وبنت بلد.. وبنت السيدة زينب البارة برضه.
درة تقريبا ندمانة إنها مخدتش الدور ده.. كان زمانها طلعت مع اللي طلعوا تريند.. والناس اتفرجت لها على حلقتين تلاته.. بدل ما هما مركزين مع عمرو سعد بس في الأجهر.
يا راجل ده سارة سلامة اللي هي مش بطلة المسلسل واخدة سوكسيه والناس بتتكلم عنها أكتر.. ولولا بس مشهدين تلاته كده مع عمرو سعد وهو بيحب فيها كانت مظهرتش في الأحداث أصلا.
العيب في القصة دي مش على درة الحقيقة لإنه بمنتهى البساطة القصة بتدور حوالين مصطفى الأجهر اللي بيدور على اخواته اللي راحوا منه وهو صغير.. وبيدور على الألماس في إفريقيا.. وبيدور على نفسه وسط الناس.. مش فاضي يا جماعة
إنما حبيبته اللي كان بيروح يشقر عليها من وقت للتاني وبتظهر في مشهدين تلاتة ماثرتش أوي في الأحداث.. عموما حصل خير ومتعوضة يا درة.. رمضان الجاي بقى وعليكي خير.
