صوت وأداء وطلة و أناقة وثقة بالنفس .. كل هذا قدرت تجمعه الفنانة المصرية مي فاروق في حفل روائع الموجي في ليلة ساحرة ، ورغم أنها كانت واحدة من نجوم كثير وثقال إلا أن مي أثبتت نفسها بجدارة وقدرت تتفوق على كل المطربين بطريقة خاصة جدا.
مي فاروق المطربة المصرية اللي اتشهرت بأغنية ياشمس يا منورة غيبي بتاعت مسلسل الليل وأخره .. ابهرت الوطن العربي كله امبارح في حفل روائع الموجي ، وتفوقت على نجوم أكبر وأقدم منها ، لكنها قدرت تعمل معادلة السهل الممتنع وبقت تريند السوشيال ميديا بعد الحفلة.
روائع الموجي، ليلة من ليالي الزمن الجميل ، حضرها واتفرج عليها جمهور عريض من الوطن العربي ، واللي أقامتها هيئة الترفيه السعودية لإحياء ذكرى الموسيقار الراحل محمد الموجي.
وطبعا اختاروا جروب كدا من النجوم اللي هيغنوا أغاني قديمة لحنها الموجي، لكن بصوت جديد علينا طبعا ، زي شيرين وأنغام ومي فاروق وصابر الرباعي وزينة عماد وعبادي الجوهري.
الحقيقة كانت حفلة فخمة فعلاً .. وبنتنا مي فاروق رفعت راس مصر وتفوقت حتى على انغام نفسها وشيرين كمان ، وغنت مي أغنية اسأل روحك لأم كلثوم .. طبعا اغنية صعبة ومش اي حد يغنيها ربع ما الست غنتها ، لكن الجميلة مي فاروق ابدعت فوق الوصف وبعد ما خلصت الاغنية اتفاجئت بتصقيف جامد جداً من الحضور
احساس بالفخر كدا وانت قاعد تتفرج على بنت بلدك قالبة الدنيا وسط كل النجوم دول ، ورغم انها معندهاش نصف المشوار الفني اللي عندهم إلا أنها كانت البريمو الليلة دي ، ومؤكد هتكون الحفلة وش السعد عليها في اللي جاي ونقطة تحول كبيرة في مشوارها الفني.
التعليقات اللي جت لمي فاروق على أدائها في حفل روائع الموجي كانت في منتهى البهجة والفخر ببنت بلدنا ، وفجأة صورها وفيديو الاغنية بتاعتها ملى صفحات فيسبوك وتويتر مع قصائد بقى من الغزل والمدح في بنت مصر
الناس بقى قالت ايه لمي فاروق ؟ كلام جميل يدخل القلب زي :” مصر تتحدث عن نفسها وانتي بتغني ” … ” غنيتي اصعب اغنية واكتر واحدة واثقة في نفسم وحضورك مختلف ” .. ” تستحقي الدرجة الكاملة ” ، وغيررره من الكلام اللي تستحقه نجمتنا مي.
في أواخر السنة اللي فاتت اتعرضت مي فاروق لأزمة صحية واجرت عملية جراحية لكن لحد دلوقتي محدش يعرف كان مالها وايه طبيعة الازمة دي ، واكتفت بس بطمأنة جمهورها وقالت انها كان عندها مشكلة واهملتها والموضوع كبر واضطرت تعمل عملية لكن اتحسنت وبقت افضل ، وده كان في نوفمبر 2022.
من الأسرار اللي كانت مخبياها مي فاروق عن جمهورها لكن أعلنته من فترة بقى ، أنها عملت عملية عشان تخس ، بعد ما قعدت6 سنين تحاول تلعب رياضةوتعمل دايت لكن كل التجارب فشلت وخدت قرار انها تعمل عملية زي التكميم ، وقالت الأعمار بيد الله بقى وزي ما تيجي ، ومن حسن حظها ان العملية نجحت وخسرت 30 كيلو من وزنها لحد ما وصلت للشكل اللي هي عليه ، وده اللي قالته بنفسها في لقائها مع منى الشاذلي .
